തിരുവനന്തപുരം: സമസ്ത വേദിയില് പെണ്കുട്ടിയെ അപമാനിച്ച സംഭവത്തില് എല്ലാ കാര്യങ്ങളും അറിഞ്ഞ ശേഷം മാത്രം പ്രതികരണം വിദ്യാഭ്യാസ മന്ത്രി. കേന്ദ്രമന്ത്രി പറയുന്നത് കൊണ്ട് മിണ്ടണം എന്നില്ല. മലപ്പുറത്ത് മുന് അധ്യാപകന് എതിരെ ഉയര്ന്ന മീ ടു ആരോപണം വിഷയം ശ്രദ്ധയില്പ്പെട്ടു. ബന്ധപ്പെട്ട ഡിഡിഇയോട് റിപ്പോര്ട്ട് തേടിയിട്ടുണ്ട്. റിപ്പോര്ട്ട് കിട്ടിയതിന് ശേഷം നടപടി എടുക്കുമെന്നും മന്ത്രി വ്യക്തമാക്കി.
വിദ്യാഭ്യാസമന്ത്രി പൊതുവേദിയില് വിദ്യാര്ത്ഥിനി അപമാനിതയായ സംഭവത്തില് പ്രതികരിക്കാത്തതെന്തെന്ന് കേന്ദ്രവിദേശകാര്യ സഹമന്ത്രി വി മുരളീധരന് ചോദിച്ചിരുന്നു. ഇതിന് മറുപടിയായാണ് വിദ്യാഭ്യാസമന്ത്രിയുടെ പരാമര്ശങ്ങള്.
മദ്രസയിലെ പുരസ്കാര വേദിയില് പെണ്കുട്ടിയെ വേദിയില് വച്ച് വിലക്കിയ സംഭവത്തില് കേസെടുത്ത് ബാലാവകാശ കമ്മീഷന്. സംഭവത്തില് സ്വമേധയാ കേസെടുത്ത ബാലാവകാശ കമ്മീഷന് സമസ്ത സെക്രട്ടറിയോട് വിശദീകരണം നല്കാന് ആവശ്യപ്പെട്ടു. പെരിന്തല്മണ്ണ എസ്.എച്.ഒ, ജില്ലാ ചൈല്ഡ് പ്രോട്ടക്ഷന് ഓഫീസര് എന്നിവരോടും ബാലാവകാശ കമ്മീഷന് റിപ്പോര്ട്ട് തേടിയിട്ടുണ്ട്. സംഭവത്തില് വിമര്ശനവുമായി നേരത്തെ കേരള ഗവര്ണര് ആരിഫ് മുഹമ്മദ് ഖാന്, ഉന്നത വിദ്യാഭ്യാസമന്ത്രി ആര്.ബിന്ദു, വനിതാ കമ്മീഷന് അധ്യക്ഷ പി.സതീദേവി എന്നിവര് രംഗത്തെത്തിയിരുന്നു.
പെരിന്തല്മണ്ണ പനങ്കാങ്കരക്കടുത്തുള്ള മദ്രസാ വാര്ഷിക പരിപാടിയുടെ ഭാഗമായി നടന്ന ചടങ്ങാണ് വിവാദമായത്. പത്താം ക്ലാസ് വിദ്യാര്ത്ഥിനിയെ പുരസ്കാരം ഏറ്റുവാങ്ങാനായി സംഘാടകര് വേദിയിലേക്ക് ക്ഷണിച്ചു. ഇത് വേദിയിലുണ്ടായിരുന്ന സമസ്ത വൈസ് പ്രസിഡണ്ട് എം.ടി അബ്ദുല്ല മുസല്യാര് സംഘാടകര്ക്ക് നേരെ തിരിഞ്ഞു. പത്താം ക്ലാസില് പഠിക്കുന്ന പെണ്കുട്ടിയെ ആരാണ് സ്റ്റേജിലേക്ക് ക്ഷണിച്ചതെന്ന് ചോദിച്ചായിരുന്നു രോഷപ്രകടനം. പെണ്കുട്ടിക്ക് പകരം രക്ഷിതാവിനോട് വരാന് പറയാനും ആവശ്യപ്പെട്ടതാണ് വിവാദമായത്.
