HIGHLIGHTS : Central government to monitor channels; The new committee has the power to suspend broadcasting if the rules are violated
ന്യൂഡല്ഹി: ടി.വി. ചാനലുകളെ നിരീക്ഷിക്കാന് നടപടി ശക്തമാക്കി കേന്ദ്രസര്ക്കാര്. ചാനലുകളെ നിരീക്ഷിക്കാന് കേന്ദ്ര സര്ക്കാര് നിയോഗിച്ച സമിതിക്ക് നിയമപരിരക്ഷ നല്കി ഉത്തരവിട്ടു.
ടി.വി. പരിപാടികള് ചട്ടം ലംഘിച്ചാല് സംപ്രേഷണം നിര്ത്തിവെക്കാന് സര്ക്കാര് ഇടപെടും. ചാനലുകളുടെ സ്വയംനിയന്ത്രണ സംവിധാനങ്ങള്ക്കും നിയമപരമായ രജിസ്ട്രേഷന് നല്കും.
നിലവില് ചാനലുകള്ക്കെതിരായ പരാതികള് പരിഗണിക്കാന് വിവിധ മന്ത്രാലയങ്ങളിലെ ഉദ്യോഗസ്ഥരുള്പ്പെട്ട സമിതിയാണുള്ളത്. ഇതിനു പുറമെ ന്യൂസ് ബ്രോഡ്കാസ്റ്റേഴ്സ് അസോസിയേഷന്റെ എന്.ബി.എസ്.എ. ഉള്പ്പടെയുള്ള സ്വയം നിയന്ത്രണ സംവിധാനങ്ങളുമുണ്ട്.
പുതിയ ഉത്തരവ് പ്രകാരം മൂന്ന് തലത്തിലുള്ള സമിതികള്ക്ക് മുന്പാകെ പരാതി നല്കാം. ആദ്യം ചാനലുകള്ക്കും പിന്നീട് മാധ്യമ കൂട്ടായ്മകളുടെ സ്വയം നിയന്ത്രണ സംവിധാനത്തെ സമീപിക്കാം. കേന്ദ്രസര്ക്കാരിന്റെ നിരീക്ഷണ സമിതിയാണ് അവസാനതലത്തിലെ കേന്ദ്രം.
അച്ചടിമാധ്യമങ്ങളുടെ ഉള്ളടക്കം നിയന്ത്രിക്കുന്നതിന് പ്രസ് കൗണ്സില് ഇപ്പോള് നിലവിലുണ്ട്. ദൃശ്യമാധ്യമരംഗത്ത് സ്വയം നിയന്ത്രണം എന്നതിനാണ് സര്ക്കാര് ഇതുവരെ മുന്തൂക്കം നല്കിയിരുന്നത്.