ഇന്ത്യന് അതിസമ്പന്നന് ഗൗതം അദാനിക്കെതിരെയുള്ള ഒസിസി ആര്പി (ഓര്ഗനൈസ്ഡ് ക്രൈം ആന്റ് കറപ്ഷന് റിപ്പോര്ട്ടിങ് പ്രൊജക്ട് ) റിപ്പോര്ട്ടില് ജെപിസി അന്വേഷണം പ്രഖ്യാപിക്കണമെന്ന് കോണ്ഗ്രസ് നേതാവ് രാഹുല്ഗാന്ധി. വിദേശ മാധ്യമങ്ങളില് ഇന്ന് വന്ന അദാനിയുടെ വാര്ത്ത അന്താരാഷ്ട്ര തലത്തില് രാജ്യത്തിന് തിരിച്ചടിയാണ്. ജി 20 യോഗം നടക്കാനിരിക്കെ ഇന്ത്യയുടെ പ്രതിഛായ മോശമാക്കി. ജെപിസി അന്വേഷണം ഉടന് പ്രഖ്യാപിക്കണമെന്നും എന്ത് കൊണ്ട് പ്രധാനമന്ത്രി നരേന്ദ്രമോദി അതിന് തയ്യാറാകുന്നില്ലെന്നും രാഹുല് ഗാന്ധി ചോദിച്ചു. അദാനിക്കെതിരെയുള്ള പത്രവാര്ത്ത ഉയര്ത്തിക്കാട്ടിയായിരുന്നു വാര്ത്താസമ്മേളനത്തിലുള്ള രാഹുലിന്റെ ചോദ്യം.
‘ജി 20 യോഗത്തിനെത്തുന്ന നേതാക്കള് ചോദ്യങ്ങള് ഉന്നയിക്കും. എന്ത് കൊണ്ടാണ് അദാനിക്ക് മാത്രം ഈ സംരക്ഷണം എന്ന ചോദ്യം ഉയരും. വിനോദ് അദാനിയുടെ പങ്കാളി ചൈനീസ് പൗരനാണ്. ഇന്ത്യയുടെ താല്പര്യം ആണ് പ്രധാനമെന്ന് പറയുമ്പോള് ചൈനക്കാരന്റെ പങ്ക് എന്താണ്.
സ്വന്തം കമ്പനികളില് രഹസ്യമായി അദാനി തന്നെ നിക്ഷേപം നടത്തിയെന്നാണ് ഒസിസിആര്പി പ്രസിദ്ധീകരിച്ച റിപ്പോര്ട്ടില് പറയുന്നത്.
നിഴല് കമ്പനികള് വഴി വിദേശത്തേക്ക് പണമൊഴുക്കിയെന്നും ഇന്ത്യന് സ്റ്റോക്ക് മാര്ക്കറ്റില് വലിയ തട്ടിപ്പ് നടത്തിയെന്നും റിപ്പോര്ട്ടില് ആരോപിക്കുന്നു. ആരോപണങ്ങള് അദാനി ഗ്രൂപ്പ് നിഷേധിച്ചിട്ടുണ്ട്. ഇന്ത്യക്കെതിരായ കരുതിക്കൂട്ടിയുള്ള ആക്രമണമാണ് തങ്ങള്ക്കെതിരായ ആരോപണമെന്നും ഗ്രൂപ്പ് പ്രതികരിച്ചു. ഇന്ത്യയിലെ സ്ഥാപനങ്ങളുടെ വിശ്വാസ്യത തകര്ക്കാനാണ് ശ്രമമെന്നും ഇതില് വ്യക്തമാക്കിയിട്ടുണ്ട്.
ഹിന്ഡന്ബര്ഗ് റിപ്പോര്ട്ടിന് പിന്നാലെയാണ് അദാനിക്ക് കുരുക്കായി പുതിയ കണ്ടെത്തലുകള് പുറത്തുവന്നിരിക്കുന്നത്. വിവിധ രാജ്യങ്ങളില് ശാഖകളുള്ള ഓര്ഗനൈസ്ഡ് ക്രൈം ആന്റ് കറപ്ഷന് റിപ്പോര്ട്ടിങ് പ്രൊജക്ട് എന്ന കൂട്ടായ്മയാണ് പുതിയ തെളിവുകള് പുറത്തുവിട്ടത്. അദാനിയുടെ കുടുംബവുമായി ബന്ധമുള്ള രണ്ടുപേര് വഴി വിദേശത്തെ നിഴല് കമ്പനികളിലൂടെ അദാനിയുടെ കമ്പനികളില് തന്നെ തിരിച്ച് നിക്ഷേപം നടത്തിയെന്നാണ് റിപ്പോര്ട്ടിലെ പ്രധാന കണ്ടെത്തല്. ഇത്തരത്തില് നിക്ഷേപം നടന്നത് 2013 മുതല് 2018 വരെയുള്ള കാലയളവിലാണ്. അദാനി കമ്പനികളുടെ പണം വ്യാജ ബില്ലുകള് ഉണ്ടാക്കി ആദ്യം വിദേശത്തെ നിഴല് കമ്പനികള്ക്ക് നല്കും. ഈ പണം ഉപയോഗിച്ച് വിദേശ നിക്ഷേപം എന്ന പേരില് സ്വന്തം ഓഹരികള് തന്നെ അദാനി വാങ്ങും. ഇതു വഴി ഓഹരി വില കൃത്രിമമായി ഉയര്ത്തി അദാനി പണം തട്ടിയെന്നും റിപ്പോര്ട്ട് പറയുന്നു. ഡിആര്ഐ പോലുള്ള ഏജന്സികള്ക്ക് ഇത് അറിയാമായിരുന്നെന്നും മോദി സര്ക്കാര് അധികാരത്തിലെത്തിയതോടെ അന്വേഷണം അട്ടിമറിച്ചെന്നും റിപ്പോര്ട്ട് പറയുന്നു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
