HIGHLIGHTS : കൊച്ചി : നായയുടെ കഴുത്തില് കുരുക്കിട്ട് കാറിന്റെ പിന്നില് കെട്ടിയിട്ട ശേഷം വാഹനമോടിച്ചുപോയ വ്യക്തിയെ കണ്ടെത്തി അറസ്റ്റ് ചെയ്തു . ചാലാക്ക സ്വദേശി ...
കൊച്ചി : നായയുടെ കഴുത്തില് കുരുക്കിട്ട് കാറിന്റെ പിന്നില് കെട്ടിയിട്ട ശേഷം വാഹനമോടിച്ചുപോയ വ്യക്തിയെ കണ്ടെത്തി അറസ്റ്റ് ചെയ്തു . ചാലാക്ക സ്വദേശി യൂസഫ് ആണ് അറസ്റ്റിലായത്. കുടുംബാഗങ്ങള്ക്ക് ഇഷ്ടമല്ലാത്തതിനാല് നായയെ ഉപേക്ഷിക്കാന് ശ്രമിച്ചതാണെന്ന് യൂസഫ് പറഞ്ഞു .സംഭവത്തില് ഡ്രൈവറുടെ ലൈസന്സ് റദ്ദാക്കാന് മന്ത്രി എ.കെ . ശശീന്ദ്രന് മോട്ടോര് വാഹന വകുപ്പിന് നിര്ദേശം നല്കി . യൂസഫിനെതിരെ ഐ.പി.സി 428 ,429 വകുപ്പുകള് പ്രകാരവും പ്രിവന്ഷന് ഓഫ് ക്രുവല്റ്റി ടു അനിമല്സ് നിയമ പ്രകാരവുമാണ് കേസ് എടുത്തത്.പരിക്കേറ്റ നായയെയും കണ്ടെത്തി.
ഇന്ന് രാവിലെയാണ് എറണാകുളത്ത് നെടുമ്പാശേരി പറവൂര് റോഡില് ചാലാക്കയില് അതിക്രൂരമായ സംഭവം നടന്നത് . 30 കിലോമീറ്ററോളം വേഗത്തില് ഓടിയിരുന്ന കാറിന്റെ ഡിക്കിയില് നായയെ ബന്ധിച്ച് വലിച്ചുകൊണ്ട് പോവുകയായിരുന്നു. ഉച്ചയോടെയാണ് സോഷ്യല് മീഡിയയില് ഇതിന്റെ വീഡിയോ പ്രത്യക്ഷപ്പെട്ടത്. ഇടയ്ക്ക് അവശനായ നായ വീഴുന്നതും ദൃശ്യങ്ങളിലുണ്ട്.
കാറിന്റെ പിന്നാലെ എത്തിയ ബൈക്ക് യാത്രക്കാരന് അഖില് ആണ് വീഡിയോ ചിത്രീകരിച്ചത്. ദൃശ്യങ്ങള് പകര്ത്തിയ അഖില് കാറിനെ മറികടന്ന് തടഞ്ഞു നിര്ത്തുകയായിരുന്നു. സംഭവത്തിന്റെ വീഡിയോ സാമൂഹികമാധ്യമങ്ങളില് പ്രചരിച്ചതോടെ നിരവധിപേരാണ് പ്രതിഷേധവുമായി രംഗത്തെത്തിയത് . ദയ ആനിമല് വെല്ഫയര് ഓര്ഗനൈസേഷന് പ്രവര്ത്തകരാണ് പരിക്കേറ്റ നിലയില് നായയെ കണ്ടെത്തിയത് . ഇവര് നായയെ ഏറ്റെടുക്കാന് സന്നദ്ധത അറിയിച്ചു .