HIGHLIGHTS : Case under the Infectious Disease Control Act against the CPM's Mega Thiruvathira
തിരുവനന്തപുരം: സിപിഎം തിരുവനന്തപുരം ജില്ലാ സമ്മേളനത്തോടനുബന്ധിച്ച് നടത്തിയ മെഗാ തിരുവാതിരക്കെതിരെ പോലീസ് കേസെടുത്തു. ജില്ലാ പഞ്ചായത്തംഗം സലൂജ ഉള്പ്പടെ കണ്ടാലറിയാവുന്ന 550 പേര്ക്കെതിരെയാണ് പാറശാല പോലീസ് കേസെടുത്തത്. പകര്ച്ചാവ്യാധി നിയന്ത്രണ നിയമപ്രകാരമാണ് കേസ്.
പൊതു സമ്മേളനങ്ങള്ക്ക് പരമാവധി 150 പേരെമാത്രം പങ്കെടുപ്പിക്കണമെന്ന ആരോഗ്യവകുപ്പിന്റെ കര്ശന നിര്ദ്ദേശം നിലനില്ക്കെയാണ് ചടങ്ങ് നടന്നത്. സംസ്ഥാനം അടച്ചിടല് ആശങ്കയുടെ വക്കിലെത്തി നില്ക്കെയാണ് കൂടിച്ചേരലിന് സിപിഎംതന്നെ വേദിയൊരുക്കുന്നത്
മെഗാ തിരുവാതിരക്കെതിരെ തിരുവനന്തപുരം ഡിസിസി വൈസ് പ്രസിഡന്റ് എം മുനീര് ഡിജിപിക്ക് പരാതി നല്കിയിരുന്നു. കോവിഡ് പ്രോട്ടോക്കോള് ലംഘിച്ചതിനെതിരെയായിരുന്നു പരാതി.
ജനാധിപത്യ മഹിള അസോസിയേഷന് പാറശാല ഏരിയ കമ്മിറ്റിയുടെ നേതൃത്വത്തില് പാറശ്ശാലയിലെ ചെറുവാരക്കോണം സിഎസ്ഐ പള്ളി മൈതാനത്തായിരുന്നു പരിപാടി. സിപിഎം പോളിറ്റ് ബ്യൂറോ അംഗം എംഎ ബേബിയും ജില്ലാ സെക്രട്ടറി ആനാവൂര് നാഗപ്പനും അടക്കമുള്ള നേതാക്കള് പരിപാടിയില് പങ്കെടുത്തിരുന്നു. കോവിഡ് കേസുകള് കുത്തനെ കൂടിയതിന് പിന്നാലെ സംസ്ഥാനത്ത് ആള്കൂട്ടങ്ങള് നിയന്ത്രിക്കാനായി സര്ക്കാര് ശക്തമായ നടപടികളെടുക്കുമ്പോഴാണ് സിപിഎം പോളിറ്റ് ബ്യൂറോ അംഗമടക്കം നിയന്ത്രണങ്ങള് ലംഘിച്ചത്. ഇതിനെതിരെ വലിയ വിമര്ശനമാണ് ഉയര്ന്നത്.