HIGHLIGHTS : Two shutters were opened at Idamalayar Dam
തൊടുപുഴ: ഇടമലയാര് അണക്കെട്ടിലെ ജലനിരപ്പ് ഉയര്ന്നു. 164.33 മീറ്റര് ആണ് നിലവിലെ ജലനിരപ്പ്. അപ്പര് റൂള് കര്വ് 163 മീറ്റര് ആണ്. അണക്കെട്ടില് റൂള് കര്വ് പിന്നിട്ട സാഹചര്യത്തില് ഇന്ന് രാവിലെ 10 മണിക്ക് അണക്കെട്ടിന്റെ രണ്ട് ഷട്ടറുകള് ഉയര്ത്തി. രണ്ടും മൂന്നും ഷട്ടറുകളാണ് ഉയര്ത്തിയത്. അണക്കെട്ടിന് ആകെ നാല് ഷട്ടറുകള് ആണുള്ളത്. സെക്കന്റില് 50 – 100 ക്യുമെക്സ് വെള്ളം തുറന്നുവിടുന്നത്. അണക്കെട്ടിലെ അനുവദനീയമായ പരമാവധി സംഭരണശേഷി 169 മീറ്റര് ആണ്.
ഇടുക്കിക്കൊപ്പം ഇടമലയാര് ഡാമില് നിന്നുള്ള വെള്ളം കൂടിയെത്തുന്നതോടെ പെരിയാറില് ജലനിരപ്പുയരുമെങ്കിലും ആശങ്കപ്പെടേണ്ട സാഹചര്യം നിലവിലില്ലെന്ന് എറണാകുളം ജില്ലാ ഭരണകൂടം അറിയിച്ചു. ആവശ്യമായ മുന്കരുതലുകളെല്ലാം സ്വീകരിച്ചിട്ടുണ്ടെന്നും ജനങ്ങള് ജാഗ്രത പാലിക്കണമെന്നും ജില്ലാ കലക്ടര് ഡോ.രേണുരാജ് അറിയിച്ചു. എവിടെയെങ്കിലും അടിയന്തരസാഹചര്യം ഉണ്ടായാല് രക്ഷാപ്രവര്ത്തനത്തിന് വിന്യസിക്കാന് 21 അംഗ എന്.ഡി.ആര്.എഫ് സേനയെ തയ്യാറാക്കി നിര്ത്തിയിട്ടുണ്ട്. ജനപ്രതിനിധികളോടും വിവിധ വകുപ്പ് ഉദ്യോഗസ്ഥരോടും സജ്ജരായിരിക്കണമെന്നും ജില്ലാ ഭരണകൂടം അറിയിച്ചു.
ഇടുക്കി അണക്കെട്ടിലും മുല്ലപ്പെരിയാര് അണക്കെട്ടിലും ജലനിരപ്പ് ഉയര്ന്നിട്ടുണ്ട്. ഇടുക്കിയില് 2386.86 അടിയായി ആണ് ജലനിരപ്പ് ഉയര്ന്നത്. മുല്ലപ്പെരിയാറിലെ ജലനിരപ്പ് 139.55 ആയി ഉയര്ന്നു. ഇടുക്കി അണക്കെട്ടില് നിന്ന് ഒഴുക്കുന്ന വെള്ളത്തിന്റെ അളവ് കൂടിയതോടെ തടിയമ്പാട് നാലു വീടുകളില് വെള്ളം കയറി. ഒരു വീടിന്റെ മതിലിടിഞ്ഞു. നിലവില് മൂന്ന് ലക്ഷം ലീറ്റര് വെള്ളമാണ് സെക്കന്റില് ഒഴുക്കുന്നത്. പത്ത് മണിയോടെ കൂടുതല് വെളളം ഒഴുക്കാന് ഇന്നലെ തീരുമാനിച്ചിരുന്നു. സെക്കന്റില് അഞ്ച് ലക്ഷം ലീറ്റര് ആയി ഉയര്ത്താനായിരുന്നു തീരുമാനം.
മുല്ലപ്പെരിയാര് ഡാമില് നിന്ന് തുറന്നു വിടുന്ന വെള്ളത്തിന്റെ അളവ് വര്ധിപ്പിച്ചിട്ടുണ്ട്. നാല് ഷട്ടറും ഉയര്ത്തിയിട്ടുണ്ട്. ഒഴുക്കി വിടുന്ന ജലത്തിന്റെ അളവ് സെക്കന്റില് 8626 ഘനയടി ആണ്. വൃഷ്ടി പ്രദേശത്ത് മഴ തുടരുന്നത് ജലനിരപ്പ് ഉയരാന് കാരണമായേക്കും. പെരിയാര് തീരത്ത് ചില വീടുകളില് വെള്ളം കയറിയിട്ടുണ്ട്.