ന്യൂയോര്ക്ക്: ഹാര്വാഡ് സര്വകലാശാലയില് വിദേശ വിദ്യാര്ത്ഥികളുടെ പ്രവേശനം വിലക്കി ട്രംപ് ഭരണകൂടം.നിലവില് പഠിക്കുന്ന വിദേശ വിദ്യാര്ഥികള് വേറെ സര്വ്വകലാശാലകളിലേക്ക് മാറണമെന്നാണ് നിര്ദേശം. അല്ലാത്ത പക്ഷം അവരുടെ വിദ്യാര്ത്ഥി വിസ റദ്ദ് ചെയ്യുമെന്നാണ് ട്രംപ് ഭരണകൂടത്തിന്റെ മുന്നറിയിപ്പ്. ഹാര്വഡ് സര്വ്വകലാശാലയിലെ മൊത്തം വിദ്യാര്ത്ഥികളില് 27 ശതമാനം 140ഓളം രാജ്യങ്ങളില് നിന്നുള്ളവരാണ് എന്നിരിക്കെയാണ് ട്രംപ് ഭരണകൂടത്തിന്റെ നടപടി. നടപടി നിയമാനുസൃതമല്ലെന്നാണ് ഹാര്വഡ് സര്വ്വകലാശാല പ്രതികരിക്കുന്നത്. ഹാര്വഡിലെ 6800 വിദേശ വിദ്യാര്ത്ഥികളെ ഈ നടപടി ബാധിക്കുമെന്നാണ് പുറത്ത് വരുന്ന വിവരം. ഇന്ത്യയില് നിന്ന് അടക്കം നിരവധി വിദ്യാര്ത്ഥികള് പഠിക്കുന്ന സര്വ്വകലാശാലകളിലൊന്നാണ് ഹാര്വഡ്.
കഴിഞ്ഞ വര്ഷം മാത്രം 6700 വിദേശ വിദ്യാര്ത്ഥികളാണ് ഹാര്വാഡില് പ്രവേശനം നേടിയിട്ടുള്ളത്. നേരത്തെ ഹാര്വാഡ് സര്വ്വകലാശാലയ്ക്കുള്ള സര്ക്കാര് ധനസഹായം അമേരിക്കന് പ്രസിഡന്റ് ഡോണള്ഡ് ട്രംപ് നിര്ത്തിയിരുന്നു. കോഴ്സ് പ്രവേശന നടപടികളില് അടക്കം ഇടപെടാനുള്ള ട്രംപിന്റെ നീക്കം യൂണിവേഴ്സിറ്റി തടഞ്ഞതോടെയായിരുന്നു ഈ പ്രതികാര നടപടി. തന്റെ ആവശ്യങ്ങള് അംഗീകരിയ്ക്കും വരെ 200 കോടി ഡോളര് സഹായം നല്കില്ലെന്ന് ട്രംപ് വിശദമാക്കിയത്.
ഗവണ്മെന്റ് ആവശ്യപ്പെട്ട ഹാര്വഡിലെ വിദേശ വിദ്യാര്ത്ഥികളുടെ പൂര്ണ വിവരങ്ങള് അടുത്ത 72 മണിക്കൂറിനുള്ളില് കൈമാറണമെന്നും ട്രംപ് ഭരണകൂടം വ്യക്തമാക്കിയിട്ടുണ്ട്. അതേസമയം ട്രംപിന്റെ വിവാദ നടപടികള്ക്കെതിരെ കോടതി നിലപാട് വ്യക്തമാക്കി.വിദേശ വിദ്യാര്ത്ഥികളുടെ വീസ സ്റ്റാറ്റസ് നിര്ത്തലാക്കുന്നതും, അവരെ അറസ്റ്റ് ചെയ്ത് തടവില് വെക്കുന്നതും ഫെഡറല് കോടതി താല്ക്കാലികമായി തടഞ്ഞു. യുഎസ് ഡിസ്ട്രിക്ട് കോടതി ജഡ്ജ് ജെഫ്റി വൈറ്റ് ആണ് ഉത്തരവ് പുറപ്പെടുവിച്ചത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
