ദില്ലി : എന് ഡി എയുടെ രാഷ്ട്രപതി സ്ഥാനാര്ഥിയായ ദ്രൗപദി മുര്മു ഇന്ന് നാമ നിര്ദേശ പത്രിക സമര്പ്പിക്കും. 12.30ഓടെയാണ് പത്രിക നല്കുന്നത്. പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ തുടങ്ങിയവര് ദ്രൗപദി മുര്മുവിനൊപ്പം പത്രികാ സമര്പ്പണത്തിനെത്തും. സഖ്യകക്ഷി നേതാക്കള്ക്കൊപ്പം ബിജു ജനതാദള്, വൈഎസ്ആര്സിപി തുടങ്ങിയ പാര്ട്ടികളില്നിന്നും പ്രതിനിധികളുണ്ടാകും. പത്രിക നല്കുന്നതിനു മുന്പ് രാഷ്ട്രപതി രാംനാഥ് കോവിന്ദുമായി കൂടിക്കാഴ്ച നടത്തിയേക്കും.
പത്രികാ സമര്പ്പണത്തിന് മുന്നോടിയായി ഇന്നലെ ദില്ലിയിലെത്തിയ മുര്മു പ്രധാനമന്ത്രി നരേന്ദ്ര മോദി, ഉപരാഷ്ട്രപതി വെങ്കയ്യ നായിഡു, അമിത് ഷാ, രാജ്നാഥ് സിംഗ്, ജെ പി നദ്ദ തുടങ്ങിയവരുമായി കൂടിക്കാഴ്ച നടത്തിയിരുന്നു. അടിസ്ഥാനവര്ഗ്ഗത്തിന്റെ പ്രശ്നങ്ങളെ കുറിച്ചും, രാജ്യത്തിന്റെ വികസനത്തിനെ കുറിച്ചും കൃത്യമായ കാഴ്ച്ചപ്പാടുള്ള നേതാവാണ് മുര്മ്മുവെന്നാണ് കൂടിക്കാഴ്ചയ്ക്ക് ശേഷം പ്രധാനമന്ത്രി നരേന്ദ്രമോദി ട്വിറ്ററില് കുറിച്ചു.
എന്ഡിഎയുടെ രാഷ്ട്രപതി സ്ഥാനാര്ത്ഥിയായ ദ്രൗപദി മുര്മുവിനെ അഭിനന്ദിച്ചു കൊണ്ട് ട്വീറ്റ് ചെയ്ത നവീന് പട്നായിക്, ഇക്കാര്യം തന്നോട് ചര്ച്ച ചെയ്തതില് സന്തോഷമുണ്ടെന്നും അറിയിച്ചു. ഉന്നത പദവിയിലേക്ക് പട്ടിക വര്ഗ്ഗത്തില് നിന്നൊരു വനിതയെ സ്ഥാനാര്ത്ഥിയാക്കതില് സന്തോഷമുണ്ടെന്ന് നിതീഷ് കുമാര് വ്യക്തമാക്കി.
2000ത്തിലാണ് ദ്രൗപതി മുര്മു റെയ്റാങ്പുര് മണ്ഡലത്തില് നിന്ന് ഒഡീഷ നിയമസഭയിലേക്ക് എംഎല്എയായി ബിജെപിയില് മത്സരിച്ച് ജയിക്കുന്നത്. തുടര്ച്ചയായി രണ്ട് തവണ എംഎല്എയായി. 2000ത്തില് ആദ്യം വാണിജ്യ-ഗതാഗത മന്ത്രി സ്ഥാനവും പിന്നീട് ഫിഷറീസ്-മൃഗസംരക്ഷണ വകുപ്പും കൈകാര്യം ചെയ്തു. 2007ല് ഒഡിഷയിലെ ഏറ്റവും മികച്ച എംഎല്എയായി തെരഞ്ഞെടുക്കപ്പെട്ട് നിലാകാന്ത പുരസ്കാരം ലഭിച്ചു. 2015ല് ദ്രൗപതിയെ ജാര്ഖണ്ഡിന്റെ ഗവര്ണറായി നിയമിച്ചു. ജാര്ഖണ്ഡില് അഞ്ച് വര്ഷം പൂര്ത്തിയാക്കുന്ന ആദ്യ ഗവര്ണറെന്ന പ്രത്യേകതയും ജാര്ഖണ്ഡിന്റെ ആദ്യ വനിതാ ഗവര്ണര് എന്ന പ്രത്യേകതയും ദ്രൗപതി മുര്മു സ്വന്തമാക്കി.
