HIGHLIGHTS : ആയുര്വേദ ഡോക്ടര്മാര്ക്ക് ശസ്ത്രക്രിയ ചെയ്യാന് അനുമതി നല്കിയതിനെതിരെ ഇന്ന് രാജ്യവ്യാപകമായി അലോപ്പതി ഡോക്ടര്മാരുടെ പണിമുടക്ക്. ഐഎംഎയുടെയും കെജി...
ആയുര്വേദ ഡോക്ടര്മാര്ക്ക് ശസ്ത്രക്രിയ ചെയ്യാന് അനുമതി നല്കിയതിനെതിരെ ഇന്ന് രാജ്യവ്യാപകമായി അലോപ്പതി ഡോക്ടര്മാരുടെ പണിമുടക്ക്. ഐഎംഎയുടെയും കെജിഎംസിടിഎയുടെയും നേതൃത്വത്തിലാണ് സമരം . 58 തരം ശസ്ത്രക്രിയകള് നടത്താന് ആയുര്വേദ ബിരുദാനന്തര ബിരുദക്കാര്ക്ക് അനുമതി നല്കിയ സെന്ട്രല് കൗണ്സില് ഓഫ് ഇന്ത്യന് മെഡിസിന് നടപടിക്കെതിരെയാണ് അലോപ്പതി ഡോക്ടര്മാരുടെ രാജ്യവ്യാപക പ്രതിഷേധം.
സര്ക്കാര്, സ്വകാര്യ ആശുപത്രികളില് രാവിലെ ആറ് മുതല് വൈകീട്ട് ആറ് വരെ ഒപി ബഹിഷ്കരിക്കും. 11 മണിക്ക് രാജ്ഭവന് മുന്നില് ഡോക്ടര്മാര് ധര്ണ നടത്തും .
കൊവിഡ്, അത്യാഹിത ചികിത്സാ വിഭാഗങ്ങളെ സമരം ബാധിക്കില്ല. അടിയന്തരമല്ലാത്ത ശസ്ത്രക്രിയകള് ചെയ്യില്ല. കിടത്തി ചികിത്സയെ ബാധിക്കില്ലെങ്കിലും സ്വകാര്യ പ്രാക്ടീസ് ഉണ്ടാകില്ല.
ആയുര്വേദ ഡോക്ടര്മാര്ക്ക് ശസ്ത്രക്രിയ ചെയ്യാനുള്ള അനുമതി നല്കുന്നത് പൊതുജന ആരോഗ്യത്തിനു എതിരാണെന്നാണ് ഐഎംഎയുടെ നിലപാട് . അതേസമയം സമരത്തിനെതിരെ ആയുര്വേദ ഡോക്ടര്മാരുടെ സംഘടന രംഗത്തെത്തി. ആയുര്വേദ സംഘടനകളുടെ നേതൃത്വത്തില് ഇന്ന് ആരോഗ്യ സംരക്ഷണ ദിനമായി ആചരിക്കുന്നുണ്ട്.