HIGHLIGHTS : KV Thomas invited as Congress representative; Sitaram Yechury
കണ്ണൂര്: മുതിര്ന്ന കോണ്ഗ്രസ് നേതാവ് കെ വി തോമസിനെ സിപിഎം പാര്ട്ടി കോണ്ഗ്രസ് സെമിനാറിലേക്ക് ക്ഷണിച്ചത് കോണ്ഗ്രസ് പ്രതിനിധി എന്ന നിലയിലെന്ന് ജനറല് സെക്രട്ടറി സീതാറാം യെച്ചൂരി. കോണ്ഗ്രസ് പുറത്താക്കിയാല് കെ വി തോമസിനെ സംരക്ഷിക്കുമോ എന്ന ചോദ്യം ഇപ്പോള് പ്രസക്തമല്ലെന്നും സീതാറാം യെച്ചൂരി പറഞ്ഞു.
സ്റ്റാലിനെ പ്രശംസിച്ചു എന്ന വാര്ത്തകള് ശരിയല്ലെന്നും യെച്ചൂരി വ്യക്തമാക്കി. ഏറ്റവും മികച്ച ബിജെപി ഇതര മുഖ്യമന്ത്രി സ്റ്റാലിന് ആണെന്ന് പറഞ്ഞിട്ടില്ല. ബിജെപി ഇതര മുഖ്യമന്ത്രിമാര് ഒന്നിച്ചു വരണം എന്നാണ് പറഞ്ഞത്. തെറ്റ് തിരുത്തി കോണ്ഗ്രസ്-സിപിഎമ്മുമായി സഹകരിക്കണമോ എന്ന് അവരാണ് തീരുമാനിക്കേണ്ടത്. ഇന്ത്യയെ സംരക്ഷിക്കണമെന്ന് ചിന്തിക്കുന്നവര് സിപിഎമ്മിനൊപ്പം ചേരും. രാഷ്ട്രീയ പ്രമേയം ഐകകണ്ഠ്യേനയാണ് പാസായതെന്നും യെച്ചൂരി കൂട്ടിച്ചേര്ത്തു.
അതേസമയം, കണ്ണൂരില് നടക്കുന്ന സിപിഎം പാര്ട്ടി കോണ്ഗ്രസ് സെമിനാറില് മുതിര്ന്ന കോണ്ഗ്രസ് നേതാവ് കെ വി തോമസ് ഇന്ന് പങ്കെടുക്കും. വൈകിട്ട് അഞ്ചിന് മുഖ്യമന്ത്രി പിണറായി വിജയനും തമിഴ്നാട് മുഖ്യമന്ത്രി എം കെ സ്റ്റാലിനുമൊപ്പമാണ് കെ വി തോമസ് വേദി പങ്കിടുക. ‘കേന്ദ്രവും സംസ്ഥാനങ്ങളും തമ്മിലുള്ള ബന്ധം’ എന്ന വിഷയത്തിലാണ് സിപിഎം പാര്ട്ടി കോണ്ഗ്രസ് സെമിനാര്.
ഇന്നലെ കെ വി തോമസിന് കണ്ണൂര് വിമാനത്താവളത്തില് സിപിഎം വന് സ്വീകരണമാണ് ഒരുക്കിയിരുന്നത്. കണ്ണൂര് ജില്ലാ സെക്രട്ടറി എം വി ജയരാജനും പാര്ട്ടി പ്രവര്ത്തകരും കെ വി തോമസിനെ സ്വീകരിക്കാന് വിമാനത്താവളത്തിലെത്തി. എം വി ജയരാജന് ചുവന്ന ഷാള് അണിയിച്ച് കെ വി തോമസിനെ സ്വീകരിച്ചു. ഹര്ഷാരവത്തോടെയാണ് എം വി ജയരാജനൊപ്പം വിമാനത്താവളത്തിന് പുറത്തെത്തിയ കെ വി തോമസിനെ സി പി എം പ്രവര്ത്തകര് സ്വീകരിച്ചത്. തനിക്ക് പറയാനുള്ളതെല്ലാം പാര്ട്ടി സമ്മേളനത്തിന്റെ ഭാഗമായ സെമിനാറില് താന് പറയുമെന്ന് കെ വി തോമസ് ഇതിനോടകം വ്യക്തമാക്കിയിട്ടുണ്ട്.