HIGHLIGHTS : 'Country's Largest Children's Play Park' at Kuttyadi, Kozhikode
‘ഇന്ത്യയിലെ ഏറ്റവും വലിയ ചില്ഡ്രന്സ് പ്ലേ പാര്ക്കാ’യ ആക്റ്റീവ് പ്ലാനറ്റ് കുറ്റ്യാടിയില്. വ്യവസായി നിസാര് അബ്ദുള്ളയാണ് പാര്ക്കിന്റെ സ്ഥാപകന്. അതിമനോഹരമായ മലഞ്ചെരുവില് കുറ്റ്യാടിയുടെ വിശാലമായ ദൃശ്യഭംഗി കൂടി സമ്മാനിക്കുന്ന സ്ഥലത്താണ് ആക്റ്റീവ് പ്ലാനറ്റ് സ്ഥിതി ചെയ്യുന്നത്. അഞ്ച് മുതല് 14 വയസുവരെയുള്ള കുട്ടികള്ക്കായുള്ള കളിസ്ഥലങ്ങളും വിനോദ പരിപാടികളുമാണ് പാര്ക്കില് ഒരുക്കിയിട്ടുള്ളത്. കുട്ടികള്ക്ക് ഉല്ലസിച്ച് സമയം ചെലവഴിക്കാന് നാല്പതിലേറെ ഫ്രീസ്റ്റൈല് സ്ലൈഡുകളും ആക്റ്റീവ് പ്ലാനറ്റിലുണ്ട്.
രാവിലെ പാര്ക്കിനുള്ളിലെ എണ്ണമറ്റ വിനോദ പരിപാടികളില് അഞ്ച് മണിക്കൂര് ചെലവഴിക്കാന് 300 രൂപ . ഉച്ചമുതല് രാത്രി വരെയുള്ള സെഷനുകളില് പങ്കെടുക്കാന് 400 രൂപ നല്കണം. വാരാന്ത്യങ്ങളില് രാവിലെയുള്ള സെഷന് 350 രൂപയും പിന്നീടങ്ങോട്ട് 450 രൂപയുമാണ് നിരക്ക്. മുതിര്ന്ന പൗരന്മാര്ക്കും ഭിന്നശേഷിക്കാര്ക്കും സൗജന്യപ്രവേശനവും പ്രത്യേക ഇളവുകളും നല്കും. രണ്ട് വയസില് താഴെയുള്ള കുട്ടികള്ക്ക് പ്രവേശനം സൗജന്യമാണ്.
രണ്ടരലക്ഷം സ്ക്വയര് ഫീറ്റില് ആയിരത്തിലധികം മരങ്ങളും 2.3 ലക്ഷം ചെടികളും അരലക്ഷം പൂച്ചെടികളുമാണ് പാര്ക്കില് ഉള്ക്കൊള്ളിച്ചിട്ടുള്ളത്. ഒപ്പം പതിനായിരം സ്ക്വയര് ഫീറ്റില് ഒരു വെര്ട്ടിക്കല് ഗാര്ഡനും സ്ഥാപിച്ചിട്ടുണ്ട്.
കുട്ടികള്ക്കൊപ്പമെത്തുന്നവര്ക്കായി കലാസാംസ്കാരിക വിരുന്നുകളും പാര്ക്കില് ഉണ്ടാകും. സായാഹ്നങ്ങളില്, പ്രത്യേകിച്ച് വാരാന്ത്യങ്ങളിലെ വൈകുന്നേരങ്ങളില് കലാ, സാംസ്കാരിക സംഘങ്ങളുടെ പ്രകടനവും ഉണ്ടാകും. ലോകത്തിന്റെ പലഭാഗങ്ങളില് നിന്നുള്ള കലാകാരന്മാര് കേരളത്തിലെ തനത് കലാകാരന്മാര്ക്കൊപ്പം പാര്ക്കില് പരിപാടികള് അവതരിപ്പിക്കും. ലോകത്തിന്റെ വിവിധ ഭാഗങ്ങളില് നിന്നുമുള്ള രുചി വൈവിധ്യങ്ങള് ഒന്നിക്കുന്ന ഫുഡ് കോര്ട്ട്, അന്താരാഷ്ട്ര നിലവാരത്തിലുള്ള ഫുഡ് ട്രക്കുകള് തുടങ്ങിയവയും ഉടന് സജ്ജമാകും.