കൊച്ചി: മോന്സന് മാവുങ്കല് പ്രതിയായ സാമ്പത്തിക തട്ടിപ്പ് കേസില് കെപിസിസി പ്രസിഡന്റ് കെ സുധാകരന് ചോദ്യം ചെയ്യലിനായി ഇന്ന് എന്ഫോഴ്സ്മെന്റിന് മുന്നില് ഹാജരാകും. കൊച്ചി ഓഫീസില് രാവിലെ 10 മണിക്കാണ് ചോദ്യം ചെയ്യല്. പുരാവസ്തു തട്ടിപ്പുമായി ബന്ധപ്പെട്ട കള്ളപ്പണ ഇടപാടാണ് ഇഡി അന്വേഷിക്കുന്നത്.
വിദേശത്ത് നിന്നെത്തുന്ന രണ്ടരലക്ഷം കോടി രൂപ കൈപ്പറ്റാന് ഡല്ഹിയിലെ തടസങ്ങള് നീക്കാന് കെ സുധാകരന് ഇടപെടുമെന്ന് ചൂണ്ടിക്കാട്ടി 25ലക്ഷം രൂപ വാങ്ങി മോന്സന് വഞ്ചിച്ചെന്നും കെ സുധാകരന് പത്ത് ലക്ഷം രൂപ കൈപ്പറ്റിയെന്നുമാണ് കേസ്. മോന്സന്റെ കലൂരിലെ വീട്ടില് വെച്ച് സുധാകരന് 10 ലക്ഷം രൂപ കൈപ്പറ്റിയെന്ന് മോന്സന്റെ മുന് ജീവനക്കാരന് ജിന്സണ് മൊഴി നല്കിയിരുന്നു. 2018 നവംബറിലായിരുന്നു പണം കൈമാറിയതെന്ന് കേസിലെ പരാതിക്കാരും മൊഴി നല്കി. മോന്സന് പണം കൈമാറുമ്പോള് കെ സുധാകരന് അവിടെയുണ്ടായിരുന്നതായി പരാതിക്കാരന് മൊഴിയില് പറഞ്ഞിട്ടുണ്ട്.
അതേസമയം, പണം വാങ്ങിയെന്ന ആരോപണം സുധാകരന് നേരത്തെ തള്ളിയിരുന്നു. കേസില് ക്രൈംബ്രാഞ്ച് അന്വേഷണം നടക്കുന്നുണ്ട്. ഇതിന് പിന്നാലെയാണ് ഇഡിയും കേസെടുത്തിരിക്കുന്നത്.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
