പാലക്കാട്: വാളയാര് പീഡന കേസില് സിബിഐയുടെ നിലവിലെ കുറ്റപത്രം പോക്സോ കോടതി തള്ളി. പുനരന്വേഷണത്തിന് പാലക്കാട് പോക്സോ കോടതി ഉത്തരവിട്ടു. സിബിഐ തന്നെ കേസ് പുനരന്വേഷിക്കാന് കോടതി ഉത്തരവിട്ടു. പെണ്കുട്ടിയുടെ അമ്മ നല്കിയ ഹര്ജിയിലാണ് കോടതിയുടെ വിധി.
പെണ്കുട്ടികളുടെ മരണം കൊലപാതകമല്ലെന്ന പോലീസ് കണ്ടെത്തല് ശരിവച്ചുള്ള കുറ്റപത്രമാണ് സിബിഐയും കോടതിയില് സമര്പ്പിച്ചിരുന്നത്. എന്നാല് ഇത് റദ്ദാക്കണമെന്നും കുട്ടികളുടെ മരണം കൊലപാതകമാണെന്നും അമ്മ കോടതിയില് നല്കിയ ഹര്ജിയില് ആരോപിച്ചിരുന്നു. ഇത് പരിഗണിച്ചാണ് പോക്സോ കോടതിയുടെ ഉത്തരവ്. സത്യം തെളിയുമെന്നാണ് പ്രതീക്ഷയെന്ന് പെണ്കുട്ടികളുടെ അമ്മ പ്രതികരിച്ചു. സത്യസന്ധമായ അന്വേഷണം പുതിയ സംഘം നടത്തണമെന്നും അവര് ആവശ്യപ്പെട്ടു.
സി.ബി.ഐ സമര്പ്പിച്ച കുറ്റപത്രം അപൂര്ണമാണെന്ന പെണ്കുട്ടികളുടെ അമ്മയുടെ വാദം അംഗീകരിച്ചാണ് പാലക്കാട് പോക്സോ കോടതി തുടരന്വേഷണത്തിന് ഉത്തരവിട്ടത്. തിരുവനന്തപുരം സിബിഐ യൂണിറ്റ് ഡിവൈഎസ്പി അനന്തകൃഷ്ണനാണ് റിപ്പോര്ട്ട് നല്കിയത്. ബലാല്സംഗം, പോക്സോ, ആത്മഹത്യ പ്രേരണ എന്നിവയാണ് പ്രതികള്ക്കെതിരെ ചുമത്തിയിരിക്കുന്ന കുറ്റങ്ങള്. ഷിബുവെന്ന പ്രതിക്കെതിരെ എസ് സി/ എസ് ടി വകുപ്പും ചുമത്തിയിട്ടുണ്ട്. കേസുമായി ബന്ധപ്പെട്ട പ്രതികള് ജാമ്യത്തിലിറങ്ങിയിരുന്നു. ഇതില് പ്രതിഷേധിച്ച് പ്രക്ഷോഭങ്ങളും നടന്നു.
മൊഴികളുടെയും ശാസ്ത്രീയ പരിശോധനകളുടെയും അടിസ്ഥാനത്തിലാണ് കുട്ടികളെ കൊലപ്പെടുത്തതിയതെന്ന വാദം സിബിഐയും തള്ളിയത്.
ഡമ്മി പരീക്ഷണമുള്പ്പെടെ സിബിഐ നടത്തിയെങ്കിലും ക്രൈംബ്രാഞ്ച് സമര്പ്പിച്ച കുറ്റപത്രത്തിന് സമാനമായ കണ്ടെത്തലുകള് ഉള്പ്പെടുത്തിയാണ് സിബിഐയും റിപ്പോര്ട്ട് സമര്പ്പിച്ചത്. എന്നാല് പെണ്കുട്ടികളുടെ മരണം കൊലപാതകമാണെന്ന അമ്മയുടെ ഹര്ജി പരിഗണിച്ചാണ് പുനരന്വേഷണത്തിന് കോടതി ഉത്തരവിട്ടത്.
