പ്രവീണ് നാരായണന് സംവിധാനം ചെയ്ത് സുരേഷ് ഗോപി വക്കീല് വേഷത്തിലെത്തുന്ന കോര്ട്ട് റൂം ത്രില്ലര് ചിത്രമായ ‘ജെ എസ് കെ- ജാനകി vs സ്റ്റേറ്റ് ഓഫ് കേരള’ ജൂണ് 27ന് ആഗോള റിലീസായി തീയേറ്ററുകളില് എത്തുന്നു. കാര്ത്തിക് ക്രിയേഷന്സുമായി സഹകരിച്ച് കോസ്മോസ് എന്റര്ടൈന്മെന്റ് നിര്മ്മിക്കുന്ന ചിത്രത്തിന്റെ നിര്മ്മാതാവ് ജെ. ഫനീന്ദ്ര കുമാര് ആണ്. സുരേഷ് ഗോപിയുടെ മകന് മാധവ് അഭിനയിക്കുന്ന ചിത്രം എന്ന പ്രത്യേകതയും ‘ജെഎസ്കെ’യ്ക്കുണ്ട്. ചിത്രത്തിന്റെതായി നേരത്തെ തന്നെ പുറത്ത് ഇറങ്ങിയിരുന്ന മോഷന് പോസ്റ്ററും ടീസറും ഏറെ അഭിപ്രായം നേടിയിരുന്നു. സുരേഷ് ഗോപിയുടേതായി പുറത്തിറങാനിരിക്കുന്ന ഒരു മാസ് പ്ലേ ആയിരിക്കും ചിത്രമെന്നും ഫാമിലി ഓഡിയന്സിനെയും യൂത്ത് ഓഡിയന്സിനെയും ഒരുപോലെ സ്വാധീനിക്കാന് കഴിവുള്ള ഒന്നായിരിക്കും ചിത്രമെന്നുമൊക്കെയാണ് ടീസര് കണ്ട പ്രേക്ഷകര് അഭിപ്രായം പറഞ്ഞിരിക്കുന്നത്. അതോടൊപ്പം ചിന്താമണി കൊലക്കേസ് എന്ന സിനിമയുമായാണ് പ്രേക്ഷകര് ജെ എസ് കെ- ജാനകി vs സ്റ്റേറ്റ് ഓഫ് കേരളയെ താരതമ്യം ചെയ്യുന്നത്. ചിത്രം ചിന്താമണി കൊലക്കേസിനെ ഓര്മ്മപ്പെടുത്തുന്നു എന്നാണ് എല്ലാവരും ഒരുപോലെ പറയുന്നത്.
ഷാജി കൈലാസിന്റെ സംവിധാനത്തില് 2006 ല് പുറത്തിറങ്ങിയ ചിന്താമണി കൊലക്കേസ് എന്ന ചിത്രത്തിലായിരുന്നു സുരേഷ് ഗോപി ഏറ്റവും അവസാനമായി വക്കീല് വേഷം അണിഞ്ഞത്. ക്രിമിനലുകളായ ക്ലയന്റുകളെ സംരക്ഷിക്കുകയും അവരെ നിയമത്തില് നിന്ന് രക്ഷപ്പെടാന് സഹായിക്കുകയും തുടര്ന്ന് അതേ ക്ലയന്റുകളെ തന്നെ കൊലപ്പെടുത്തി നീതി സ്വന്തം കൈകളിലേക്ക് എടുക്കുകയും ചെയ്യുന്ന ലാല് കൃഷ്ണ വിരടിയാര് എന്ന സൈക്കോട്ടിക് വിജിലന്റ് അഭിഭാഷകനായാണ് ചിത്രത്തില് സുരേഷ് ഗോപി എത്തിയിരുന്നത്. ബോക്സ് ഓഫീസ് ഹിറ്റ് ആയി മാറിയ ചിത്രത്തിലൂടെ സുരേഷ് ഗോപി തന്റെ പെര്ഫോമന്സിലും മികച്ച അഭിപ്രായം നേടിയിരുന്നു. ചിന്താമണി കൊലക്കേസ് കഴിഞ്ഞു വീണ്ടും 19 വര്ഷങ്ങള്ക്ക് ശേഷമാണ് സുരേഷ്ഗോപി വീണ്ടുമൊരു വക്കീല് വേഷം ചെയ്യുന്നതെന്നതാണ് ജെ എസ് കെ- ജാനകി vs സ്റ്റേറ്റ് ഓഫ് കേരളയുടെ പ്രധാന ആകര്ഷണം.
നീണ്ട ഇടവേളക്ക് ശേഷം അനുപമ പരമേശ്വരന് മലയാളത്തിലേക്ക് തിരിച്ചു വരുന്ന സിനിമ എന്ന പ്രത്യേകത കൂടി ജെ എസ് കെ- ജാനകി vs സ്റ്റേറ്റ് ഓഫ് കേരളക്കുണ്ട്. പ്രേമം എന്ന ചിത്രത്തിലൂടെ മലയാളികളുടെ പ്രിയങ്കരിയായ അനുപമ പരമേശ്വരന് പിന്നീട് തമിഴ്, തെലുങ്ക് ചിത്രങ്ങളിലെ നായികാ വേഷങ്ങളിലൂടെ തെന്നിന്ത്യയില് മുഴുവന് പ്രശസ്തയായി മാറിയിരുന്നു. പ്രേമത്തിന് ശേഷം ഏതാനും മലയാള ചിത്രങ്ങള് ചെയ്തെങ്കിലും ഒരു വലിയ ഇടവേളക്ക് ശേഷമാണ് അതിശക്തമായ ഒരു കഥാപാത്രവുമായി ജെഎസ്കെയിലൂടെ താരം തിരിച്ചെത്തുന്നത്. അനുപമ പരമേശ്വരനെ കൂടാതെ ദിവ്യപിള്ള, ശ്രുതി രാമചന്ദ്രന് എന്നിവരും ചിത്രത്തില് നായികാകഥാപാത്രങ്ങളെ അവതരിപ്പിക്കുന്നു. അസ്കര് അലി, മാധവ് സുരേഷ് ഗോപി, ബൈജു സന്തോഷ്, ജയന് ചേര്ത്തല, ജോയ് മാത്യു, അഭിലാഷ് രവീന്ദ്രന്, രജിത് മേനോന്, നിസ്താര് സേട്ട്, രതീഷ് കൃഷ്ണന്, ഷഫീര് ഖാന്, മഞ്ജുശ്രീ നായര്, ജയ് വിഷ്ണു, വൈഷ്ണവി രാജ്, മേധ പല്ലവി, കോട്ടയം രമേഷ്, ദിലീപ്, ബാലാജി ശര്മ എന്നിവരാണ് മറ്റു താരങ്ങള്.
എക്സിക്യൂട്ടീവ് പ്രൊഡ്യൂസേഴ്സ്- സജിത് കൃഷ്ണ, കിരണ് രാജ്, ഹുമയൂണ് അലി അഹമ്മദ്, ഛായാഗ്രഹണം- റെനഡിവേ, എഡിറ്റിംഗ്- സംജിത് മുഹമ്മദ്, പശ്ചാത്തല സംഗീതം- ജിബ്രാന്, സംഗീതം- ഗിരീഷ് നാരായണന്, മിക്സ്- അജിത് എ ജോര്ജ്, സൌണ്ട് ഡിസൈന്- സിങ്ക് സിനിമ, കലാസംവിധാനം- ജയന് ക്രയോണ്, ചീഫ് അസോസിയേറ്റ്സ്- രജീഷ് അടൂര്, കെ. ജെ. വിനയന്, ഷഫീര് ഖാന്, പ്രൊഡക്ഷന് കണ്ട്രോളര്- അമൃത മോഹനന്, സംഘട്ടനം – മാഫിയ ശശി, ഫീനിക്സ് പ്രഭു, രാജശേഖര്, നൃത്തസംവിധാനംഃ സജിന മാസ്റ്റര്, വരികള്- സന്തോഷ് വര്മ്മ, ജ്യോതിഷ് കാശി, ഹരിത ഹരിബാബു, വസ്ത്രങ്ങള്- അരുണ് മനോഹര്, മേക്കപ്പ്- പ്രദീപ് രംഗന്, അസ്സോസിയേറ്റ് ഡിറക്ടര്സ്- ബിച്ചു, സവിന് എസ്. എ, ഹരിപ്രസാദ് കെ, വിഎഫ്എക്സ്- ഐഡന്റ് ലാബ്സ്, ഡിഐ- കളര് പ്ലാനറ്റ്, സ്റ്റില്സ്- ജെഫിന് ബിജോയ്, മീഡിയ ഡിസൈന്- ഐഡന്റ് ലാബ്സ്, ഓണ്ലൈന് പ്രൊമോഷന്- ആനന്ദു സുരേഷ്, ജയകൃഷ്ണന് ആര്. കെ., വിഷ്വല് പ്രമോഷന്- സ്നേക് പ്ലാന്റ് എല്എല്സി, പിആര്ഒ- വൈശാഖ് സി വടക്കേവീട്, ജിനു അനില്കുമാര്, മാര്ക്കറ്റിംഗ് ആന്ഡ് ഡിസ്ട്രിബൂഷന്- ഡ്രീം ബിഗ് ഫിലിംസ്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
