കൊച്ചി: ഭീകര സംഘടനയായ ഐഎസില് ചേര്ന്ന് ഇന്ത്യയുടെ സുഹൃത് രാജ്യങ്ങളോട് യുദ്ധം ചെയ്തെന്ന കേസില് മലയാളിയായ സുബ്ഹാനി ഹാജ മൊയ്തീന് ജീവപര്യന്തം തടവും ഒരു ലക്ഷം രൂപ പിഴയും. കൊച്ചി എന്ഐഎ പ്രത്യേക കോടതിയാണ് ശിക്ഷ വിധിച്ചത്. വിവിധ വകുപ്പുകളിലായി 19 വര്ഷത്തേക്കാണ് ശിക്ഷ വിധിച്ചിരിക്കുന്നത്.
ഇന്ത്യയുമായി സഖ്യത്തിലുള്ള ഏഷ്യന് രാജ്യത്തിനെതിരെ യുദ്ധം ചെയ്ത സംഭവത്തില് കേരളത്തില് രജിസ്റ്റര് ചെയ്ത ആദ്യ കേസാണിത്. 2015 ല് തുര്ക്കി വഴി ഇറാഖിലേക്ക് പോയ സുബ്ഹാനി ഐഎഎസില് ചേര്ന്ന് പരിശീലനം നേടി.
കേസില് വിചാരണ നേരിട്ട ഏക പ്രതിയാണ് തൊടുപുഴ മാര്ക്കറ്റ് റോഡ് മാളിയേക്കല് വീട്ടില് സുബ്ഹാനി ഹാജ മൊയ്തീന്. ഇന്ത്യന് ശിക്ഷാ നിയമം 125,120 ബി, 122, നിയമവിരുദ്ധ പ്രവര്ത്തനം തടയല് നിയമത്തിലെ 20, 38, 39 എന്നീ വകുപ്പുകള് പ്രകാരമാണ് കുറ്റപത്രം സമര്പ്പിച്ചിരിക്കുന്നത്. പ്രതിയെ അറസ്റ്റ് ചെയ്തത് 2016 ല് കനകമലയില് ഐഎസ് ഗൂഢാലോചന നടത്തിയ കേസിലെ അന്വേഷണത്തിനിടെയായിരുന്നു.
