കോവിഡ് 19 പ്രതിരോധത്തിന്റെ ഭാഗമായി മലപ്പുറം ജില്ലയില് ഹോട്ട് സ്പോട്ട് പ്രദേശങ്ങളുടെ പുതിയ പട്ടിക പുറത്തുവിട്ടു. കോവിഡ് ബാധിച്ച് ചികിത്സയിലുള്ളവരും കൂടുതല് പേര് നിരീക്ഷണത്തിലുള്ളതുമായ ഏഴ് ഗ്രാമ പഞ്ചായത്തുകളാണ് ഹോട്ട് സ്പോടില് ഉള്പ്പെടുന്നത്. വേങ്ങര, ചുങ്കത്തറ, തെന്നല, ഒഴൂര്, തലക്കാട്, കണ്ണമംഗലം, എ.ആര്. നഗര് എന്നീ പഞ്ചായത്തുകളാണ് നിലവില് ഹോട്ട് സ്പോടുകള്. ഇവിടങ്ങളില് അതീവ ജാഗ്രത തുടരുമെന്ന് ജില്ലാ കലക്ടര് ജാഫര് മലിക് അറിയിച്ചു.
ഹോട്ട് സ്പോടായി പ്രഖ്യാപിച്ച ഏഴ് ഗ്രാമ പഞ്ചായത്തുകളിലും അകത്തേക്കും പുറത്തേക്കുമുള്ള യാത്രകള് അനുവദിക്കില്ല. അത്യാവശ്യങ്ങള്ക്കു മാത്രമെ ജനങ്ങള് പുറത്തിറങ്ങാവൂ. പുറത്തിറങ്ങുന്നവരെ പൊലീസ് കര്ശനമായി പരിശോധിക്കും. അനാവശ്യമായി പുറത്തിറങ്ങുന്നവര്ക്കെതിരെ ശക്തമായ നിയമ നടപടികള് സ്വീകരിക്കും. ജനങ്ങള് കൂട്ടം കൂടുന്ന സാഹചര്യം യാതൊരു കാരണവശാലും അനുവദിക്കില്ല. ഇക്കാര്യം പൊലീസ് പ്രത്യേകം നിരീക്ഷിച്ചു വരികയാണ്. ജാഗ്രതാ നിര്ദേശങ്ങള് ലംഘിക്കുന്നവര്ക്കെതിരെ പകര്ച്ചവ്യാധി നിയമപ്രകാരം കേസെടുത്ത് നടപടി സ്വീകരിക്കും.
ലോക് ഡൗണ് നിലനില്ക്കുന്ന സാഹചര്യത്തില് ജില്ലയില് മുഴുവന് പ്രദേശങ്ങളിലും നിയന്ത്രണങ്ങള് മാറ്റമില്ലാതെ തുടരുകയാണ്. ഹോട്ട് സ്പോടില് പെടാത്ത മേഖലകളിലും നിയന്ത്രണങ്ങളില് യാതൊരു ഇളവുകളുമില്ല. രോഗവ്യാപനം കുറയുന്നത് കണക്കിലെടുത്ത് നിലവിലുള്ള സാമൂഹിക അകലവും ആരോഗ്യ ജാഗ്രതയും ലംഘിക്കാനുള്ള ശ്രമങ്ങളുണ്ടായാല് കര്ശന നിയമ നടപടികള് നേരിടേണ്ടിവരുമെന്നും ജില്ലാ കലക്ടര് മുന്നറിയിപ്പു നല്കി. അനുമതിയില്ലാതെ ജില്ലാ അതിര്ത്തി കടക്കരുത്. ചരക്കു വാഹനങ്ങളിലും മറ്റുമായി ജില്ലയിലേക്ക് പ്രവേശിച്ചാല് പകര്ച്ച വ്യാധി നിയമപ്രകാരം കേസെടുത്ത് കര്ശന നടപടികള് സ്വീകരിക്കും. ഇത്തരത്തിലുള്ള നിയമ ലംഘനങ്ങള് കണ്ടെത്താന് അതിര്ത്തികളില് പൊലീസും മോട്ടോര് വാഹന വകുപ്പും പരിശോധന കര്ശനമാക്കിയിട്ടുണ്ട്. ചികിത്സാ ആവശ്യത്തിനായി ജില്ലയില് നിന്ന് പുറത്തു പോയി ഏപ്രില് ഒന്നിനു ശേഷം തിരിച്ചെത്തിയവര് നിര്ബന്ധമായും വീടുകളില് 28 ദിവസത്തെ സ്വയം നിരീക്ഷണത്തില് കഴിയുകയും വിവരം ആരോഗ്യ വകുപ്പിനെ അറിയിക്കുകയും വേണം.
കോവിഡ് ബാധിതരുമായി സമ്പര്ക്കത്തിലേര്പ്പെട്ടവര് മുഴുവന് പഞ്ചായത്തുകളിലും നഗരസഭകളിലും നിരീക്ഷണത്തില് കഴിയുന്നുണ്ട്. രോഗം സ്ഥിരീകരിച്ചവരുടേയും സമ്പര്ക്കം പുലര്ത്തിയവരുടേയും നിരീക്ഷണ കാലയളവ് പൂര്ത്തിയായിട്ടില്ല. യൂറോപ്യന് രാജ്യങ്ങളില് നിന്ന് ഉള്പടെ വിവിധ വിദേശ രാജ്യങ്ങളില് നിന്നെത്തിയ മലപ്പുറം സ്വദേശികളും നിരീക്ഷണത്തില് തുടരുകയാണ്. ഇതര സംസ്ഥാനങ്ങളില് നിന്നും ജില്ലകളില് നിന്നും മലപ്പുറം സ്വദേശികള് തിരിച്ചെത്തുന്ന സാഹചര്യവും നിലനില്ക്കുന്നുണ്ട്. ഈ പശ്ചാത്തലത്തില് ജില്ല മുഴുവന് അതിതീവ്ര മേഖലയായി പരിഗണിച്ച് ഇതുവരെ തുടര്ന്ന നിയന്ത്രണങ്ങള് മാറ്റമില്ലാതെ തുടരുമെന്നും ഇതില് വരുന്ന മാറ്റങ്ങള് യഥാസമയം പൊതുജനങ്ങളെ അറിയിക്കുന്നതാണെന്നും ജില്ലാ കലക്ടര് വ്യക്തമാക്കി.
ഹോട്ട് സ്പോട്ട് പ്രദേശങ്ങളിലെ രോഗ വിവരങ്ങള്
വേങ്ങര ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – 30
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – 19
ചുങ്കത്തറ ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – 38
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – ഒന്ന്
തെന്നല ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഇല്ല
പ്രൈമറി കോണ്ടാക്ടില് നിരീക്ഷണത്തിലുള്ളവര് – 72
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – ഇല്ല
ഒഴൂര് ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – 11
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – 40
തലക്കാട് ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – ഒന്ന്
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – 13
കണ്ണമംഗലം ഗ്രാമ പഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – രണ്ട്
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – ഇല്ല
എ.ആര്. നഗര് ഗ്രാമപഞ്ചായത്ത്
കോവിഡ് ബാധിച്ച് ചികിത്സയിലുള്ളവര് – ഒന്ന്
പ്രൈമറി കോണ്ടാക്ടില് നിരീക്ഷണത്തിലുള്ളവര് – ഇല്ല
സെക്കന്ഡറി കോണ്ടാക്ടില് നിരീക്ഷണത്തിലുള്ളവര് – ഇല്ല
