പാലക്കാട്: കൂറ്റനാടിന് സമീപം അപകടകരമായ രീതിയില് ഓവര്ടേക്കിങ് നടത്തിയ ബസ് ഒറ്റയ്ക്ക് തടഞ്ഞിട്ട് സ്കൂട്ടര് യാത്രക്കാരിയായ യുവതി. ചാലിശ്ശേരിക്കടുത്ത് പെരുമണ്ണൂര് സ്വദേശി സാന്ദ്രയാണ് പാലക്കാട് ഗുരുവായൂര് റൂട്ടില് സര്വീസ് നടത്തിയ രാജപ്രഭ എന്ന ബസ് തടഞ്ഞിട്ടത്.
രാവിലെ സാന്ദ്ര റോഡിലൂടെ പോകുമ്പോള് ബസ് തന്റെ സ്കൂട്ടറിനെ ഓവര്ടേക്ക് ചെയ്യുന്നതിനിടെ ഇടിച്ചിടാന് പോയെന്നും അപകടകരമായരീതിയില് ബസ് കടന്നു പോകുകയായിരുന്നു. എതിരെ വന്ന ലോറിയെ കടന്നു പോകുന്നതിനിടെയാണ് ബസ് ഡ്രൈവറുടെ ഭാഗത്ത് നിന്ന് ഈ അതിക്രമം ഉണ്ടായത്. തുടര്ന്ന് ഒന്നര കിലോമീറ്ററോളം പിന്തുടര്ന്ന് സാന്ദ്ര ബസിനെ മറികടന്ന് തടഞ്ഞിടുകയായിരുന്നു.
സാന്ദ്ര പിന്തുടര്ന്ന് ബസ് തടയുമ്പോള് ചെവിയില് ഇയര്ഫോണ് കുത്തിവച്ച നിലയിലായിരുന്നു ഡ്രൈവര്. സംഭവത്തിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്.
