കേരളത്തില് വിവിധ ജില്ലകളില് ഇന്നും ശക്തമായ മഴ തുടരുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. 9 ജില്ലകളില് ഇന്ന് യെല്ലോ അലേര്ട്ട് മുന്നറിയിപ്പുണ്ട്. കോട്ടയം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് ഇന്ന് യെല്ലോ അലര്ട്ട് പ്രഖ്യാപിച്ചിരിക്കുകയാണ്.
ബംഗാള് ഉള്ക്കടലില് രൂപം കൊണ്ട ന്യൂനമര്ദം അടുത്ത 48 മണിക്കൂറിനുള്ളില് ശക്തിപ്രാപിക്കുമെന്നതും നേരിയ ആശങ്കയുയര്ത്തുന്നുണ്ട്. ഇതിന്റെ സ്വാധീന ഫലമായി വടക്കന് കേരളത്തില് മഴ കനക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തല്.
മുല്ലപ്പെരിയാര് അണക്കെട്ടില് ജലനിരപ്പ് 138.40 അടിയായി ഉയര്ന്നിരിക്കുകയാണ്. ഡാമിലേക്കുള്ള നീരൊഴുക്കും വര്ധിച്ചിട്ടുണ്ട്. ഡാമില് നിന്ന് കൂടുതല് വെള്ളം തുറന്നുവിടുന്നുണ്ട്. ജലനിരപ്പ് ഉയര്ന്നതിനെത്തുടര്ന്നാണ് വെള്ളത്തിന്റെ അളവ് കൂട്ടിയത്. സെക്കന്റില് 3119 ഘനയടി ആയാണ് കൂട്ടിയത്. ആറു ഷട്ടറുകള് 50 സെന്റിമീറ്റര് വീതം ഉയര്ത്തിയിട്ടുണ്ട്.
