പരപ്പനങ്ങാടി: തിരൂരങ്ങാടി നിയോജകമണ്ഡലത്തില് നിയാസ് പുളിക്കലകത്ത് ഇടതു സ്വതന്ത്രനായി മത്സരിക്കും. നേരത്തെ പ്രഖ്യാപിച്ച അജിത് കൊളാടിയെ മാറ്റിയാണ് നിയാസിനെ സ്ഥാനാര്ത്ഥിയാക്കിയിരിക്കുന്നത്.
നിലവില് സിഡ്കോ ചെയര്മാനായ നിയാസ് പുളിക്കലകത്ത് കഴിഞ്ഞ തവണ ഈ മണ്ഡലത്തില് ശക്തമായ പോരാട്ടം നടത്തി പരാജയപ്പെട്ടതാണ്.
പരപ്പനങ്ങാടി സിപിഎം ഏരിയാകമ്മറ്റി ഓഫീസില് വെച്ച് നടന്ന കണ്വെന്ഷനില് അജിത് കൊളാടിയാണ് നിയാസിന്റെ സ്ഥാനാര്ത്ഥിത്വം പ്രഖ്യാപിച്ചത്.
മുസ്ലീംലീഗ് ഈ മണ്ഡലത്തില് തങ്ങളുടെ സംസ്ഥാന ജനറല് സക്രട്ടറിയായ കെപിഎ മജീദിനെ സ്ഥാനാര്ത്ഥിയായി പ്രഖ്യാപിച്ചതോടെ ഉണ്ടായ രാഷ്ട്രീയ സംഭവവികാസങ്ങളാണ് ഇടതുമുന്നണിയെ പുതിയ തീരുമാനത്തിലേക്ക് എത്തിച്ചത്.
കെപിഎ മജീദിന്റെ സ്ഥാനാര്ത്ഥിത്വം പ്രഖ്യാപിച്ചതോടെ മണ്ഡലത്തില് ശക്തമായി എതിര്പ്പ് ഉയര്ന്നിരുന്നു. മുന് എംഎല്എ പിഎംഎ സലാമായിരിക്കും ഇവിടെ മത്സരിക്കുകയെന്നാണ് കരുതിയിരുന്നത്. ഇത് മാറിയതോടെ പ്രാദേശികമായി ശക്തമായ എതിര്പ്പാണ് മജീദിനെതിരെ ഉയര്ന്നത്. ഇതേ തുടര്ന്നുള്ള രാഷ്ട്രീയ സാഹചര്യം മുതലെടുക്കാമെന്ന കണക്കുട്ടലിലാണ് നിയാസിനെ തന്നെ രംഗത്തിറിക്കിയിരിക്കുന്നത്.
2011ല് മൃഗീയ ഭൂരിപക്ഷമുണ്ടായിരുന്ന മണ്ഡലത്തില് കഴിഞ്ഞ തവണ മുന് വിദ്യഭ്യാസമന്ത്രിയായിരുന്ന പികെ അബ്ദുറബ്ബിനോട് ആറായിരിത്തില് പരം വോട്ടനാണ് നിയാസ് പരാജയപ്പെട്ടത്.
