തിരുവനന്തപുരം: മുല്ലപ്പെരിയാര് അണക്കെട്ടില്നിന്നും മുന്നറിയിപ്പില്ലാതെ വെള്ളം തുറന്നു വിട്ടതിലുള്ള പ്രതിഷേധം കേന്ദ്ര ജല കമ്മീഷനെയും മേല്നോട്ട സമിതി ചെയര്മാനെയും തമിഴ്നാടിനെയും അറിയിക്കുമെന്നു ജലവിഭവമന്ത്രി റോഷി അഗസ്റ്റിന്. രാത്രികാലങ്ങളില് വെള്ളം തുറന്നു വിടുന്നത് ഒഴിവാക്കണം. ജലനിരപ്പ് 142 അടിയായാല് പകല് തന്നെ കൂടുതല് വെള്ളം തുറന്നു വിടണം.
രാത്രിയില് വെള്ളം ഒഴുക്കുന്ന സ്ഥിതി ഒട്ടും ഭൂഷണമല്ല. ഇരു സംസ്ഥാനങ്ങളും ചര്ച്ച ചെയ്തു പുതിയ അണക്കെട്ട് നിര്മിക്കാനായി പരസ്പര സഹകരണത്തിനാണ് ശ്രമിക്കുന്നത്. തമിഴ്നാടുമായി തര്ക്കമില്ല. തമിഴ്നാടിന് വെള്ളവും കേരളത്തിനു സുരക്ഷയുമാണ് ഉറപ്പാക്കേണ്ടത്.
രാത്രിയില് ജലം ഒഴുക്കിവിടാതെ പകല് ഒഴുക്കണമെന്ന കേരളത്തിന്റെ ആവശ്യത്തോട് തമിഴ്നാട് അനുകൂലമായി പ്രതികരിക്കുമെന്നാണു പ്രതീക്ഷിക്കുന്നതെന്നും മന്ത്രി പറഞ്ഞു.
മുല്ലപ്പെരിയാര് ഡാമില് തുറന്ന ഒന്പത് ഷട്ടറുകളില് ആറെണ്ണം അടച്ചു. ജലനിരപ്പ് 141.95 അടിയായി; 3 ഷട്ടറുകള് 30 സെന്റിമീറ്റര് വീതമാണ് തുറന്നിരിക്കുന്നത്.
