കോഴിക്കോട്:കോഴിക്കോട്:താമരശ്ശേരി ചുരത്തില് മണ്ണിടിച്ചില് തുടര്ന്നുകൊണ്ടിരിക്കുന്ന സാഹചര്യത്തില് ഇതുവഴിയുള്ള ഗതാഗതം ഇനിയൊരു അറിയിപ്പുണ്ടാകുന്നതു വരെ പൂര്ണമായും നിരോധിച്ചതായി ജില്ലാ കലക്ടര് സ്നേഹില് കുമാര് സിംഗ് അറിയിച്ചു. ശക്തമായ മഴയില് കൂടുതല് പാറക്കഷ്ണങ്ങളും മണ്ണും റോഡിലേക്ക് വീഴുന്നത് തുടരുന്ന സാഹചര്യത്തിലാണിത്. ആംബുലന്സ് ഉള്പ്പെടെയുള്ള എമര്ജന്സി വാഹനങ്ങള് പോലിസിന്റെ അനുമതിയോടെ കടത്തിവിടും. നിയന്ത്രണങ്ങളുമായി ജനങ്ങള് സഹകരിക്കണമെന്നും ജില്ലാകലക്ടര് അറിയിച്ചു. കുറ്റ്യാടി ചുരത്തിലും ഗതാഗതക്കുരുക്കിന് സാധ്യതയുള്ളതിനാല് ചുരംവഴിയുള്ള അത്യാവശ്യമല്ലാത്ത യാത്രകള് ഒഴിവാക്കണമെന്നും അറിയിച്ചിട്ടുണ്ട്.
റോഡില് നിന്ന് മണ്ണ് നീക്കം ചെയ്യാനുള്ള പ്രവൃത്തികള് നല്ല രീതിയില് പുരോഗമിക്കുകയാണ്. താമരശ്ശേരി തഹസില്ദാര് സി സുബൈര് ഉള്പ്പെടെയുള്ള റവന്യൂ ഉദ്യോഗസ്ഥരുടെ നേതൃത്വത്തില് പോലിസ്, ഫയര് ആന്റ് റെസ്ക്യൂ ഉള്പ്പെടെയുള്ള ഏജന്സികള് ഇതുമായി ബന്ധപ്പെട്ട പ്രവര്ത്തനങ്ങള് നല്ല രീതിയില് ഏകോപിപ്പിക്കുന്നുണ്ടെന്നും ജില്ലാ കലക്ടര് അറിയിച്ചു.
കോഴിക്കോട് ജില്ലാ ദുരന്ത നിവാരണ വിഭാഗം ഡെപ്യൂട്ടി കലക്ടര് എം രേഖ, ഹസാഡ് അനലിസ്റ്റ് പി അശ്വതി, ജില്ലാ സോയില് കണ്സര്വേഷന് ഓഫീസര് എം രാജീവ്, അസിസ്റ്റന്റ് ജിയോളജിസ്റ്റ് ദീപ ഉള്പ്പെടെയുള്ള സംഘം ഇന്നലെ സംഭവ സ്ഥലം സന്ദര്ശിക്കുകയും ആവശ്യമായ നടപടികള് നിര്ദ്ദേശിക്കുകയും ചെയ്തിട്ടുണ്ടെന്നും കലക്ടര് അറിയിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
