തിരുവനന്തപുരം: കെഎസ്ഇബി ഓഫീസേഴ്സ് അസോസിയേഷന് പ്രസിഡന്റ് എം ജി സുരേഷ് കുമാറിനെതിരെ നടപടി. വൈദ്യുതി മന്ത്രി എം. എം. മണിയുടെ അഡീ. പ്രൈവറ്റ് സെക്രട്ടറി ആയിരിക്കെ ഔദ്യോഗിക വാഹനം സ്വകാര്യ ആവശ്യത്തിന് ഉപയോഗിച്ചത്തിനെതിരെയാണ് നടപടി. 48640 കി.മീ. സ്വകാര്യ ആവശ്യത്തിനുപയോഗിച്ചത്തിന് 6,72,560 രൂപ നഷ്ടപരിഹാരം നല്കണം എന്നാണ് കെ എസ് ഇ ബി ചെയര്മാന് നോട്ടിസ് അയച്ചിരിക്കുന്നത്. 10 ദിവസത്തിനകം തൃപ്തികരമായ വിശദീകരണം നല്കിയില്ലെങ്കില് 12 ഗഡുക്കളായി ശമ്പളത്തില് നിന്ന് പിടിക്കുമെന്നും നോട്ടീസില് പറയുന്നുണ്ട്.
വൈദുതി ഭവന് വളയല് സമരം നടന്ന ദിവസമാണ് നോട്ടീസിറങ്ങിയത്. എന്നാല്, കെ എസ് ഇ ബി ചെയര്മാന്റെ നോട്ടിസിന് പ്രതികരണവുമായി കെ എസ് ഇ ബി ഓഫീസേഴ്സ് അസോസിയേഷന് പ്രസിഡന്റ് എം ജി സുരേഷ് കുമാര് രംഗത്തെത്തി. പിഴ ഈടാക്കിയ കെ എസ് ഇ ബി ചെയര്മാന്റെ നടപടി പ്രശ്ന പരിഹാര ശ്രമങ്ങളെ അട്ടിമറിക്കാനുള്ള നീക്കമാണെന്ന് അദ്ദേഹം ആരോപിച്ചു. നോട്ടീസ് കിട്ടിയിട്ടില്ലെന്ന് സുരേഷ് കുമാര് പറയുന്നു.
അതേസമയം, കെഎസ്ഇബിയിലെ അച്ചടക്ക നടപടിയില് ഒരാഴ്ച്ചയ്ക്കുള്ളില് തീരുമാനമെന്ന് വൈദ്യുതി മന്ത്രി കെ കൃഷ്ണന്കുട്ടി ഇന്നലെ അറിയിച്ചു. നിയമപരമായും പ്രതികാര നടപടിയില്ലാതെയും അച്ചടക്ക നടപടി പൂര്ത്തിയാക്കും. നടപടിക്രമങ്ങളും കീഴ് വഴക്കങ്ങളും അനുസരിച്ച് തീരുമാനമെടുക്കും. കെഎസ്ഇബി തര്ക്കത്തില് ചര്ച്ച ഫലപ്രദമെന്നും കെ കൃഷ്ണന്കുട്ടി പറഞ്ഞു.
