പരപ്പനങ്ങാടി:പരപ്പനങ്ങാടി മുനിസിപ്പാലിറ്റിയിലെ കടലോര മേഖലകളില് കഴിഞ്ഞ കുറച്ചു വര്ഷങ്ങളായി കിഡ്നി രോഗികളുടെ എണ്ണം ആശങ്കാജനകമായി വര്ധിച്ചു കൊണ്ടിരിക്കുകയാണെന്നും പല കുടുംബങ്ങളിലും ഒന്നിലധികം പേര്ക്ക് കിഡ്നി സംബന്ധമായ ഗുരുതര ആരോഗ്യ പ്രശ്നങ്ങള് കണ്ടെത്തപ്പെടുന്നുവെന്നത് പ്രദേശവാസികളെ വലിയ ആശങ്കയിലാഴ്ത്തിയിരിക്കുകയാണന്നും പരപ്പനങ്ങാടി സിപിഐ ലോക്കല് കമ്മിറ്റി.
ഒരു ചെറിയ പ്രദേശത്ത് ഒരേ സ്വഭാവത്തിലുള്ള ഗുരുതര രോഗങ്ങള് കൂട്ടത്തോടെ വര്ധിക്കുന്നത് പൊതുജനാരോഗ്യ മേഖലയിലെ ഗൗരവമായ മുന്നറിയിപ്പായി കണക്കാക്കപ്പെടേണ്ട വിഷയമാണ്. പ്രദേശവാസികള്ക്കിടയില് ഇതിന്റെ കാരണങ്ങളെക്കുറിച്ച് നിരവധി സംശയങ്ങള് ഉയരുന്നുണ്ട്.
കുടിവെള്ളത്തിന്റെ ഗുണനിലവാരം, ഭൂഗര്ഭജലത്തിലെ ലവണാംശം വര്ധിച്ചത്, പരിസ്ഥിതി മലിനീകരണം, രാസപദാര്ത്ഥങ്ങളുടെ സാന്നിധ്യം, ഭക്ഷണരീതികളിലെ മാറ്റങ്ങള് എന്നിവ ഇതിന് പിന്നിലെ സാധ്യതകളായി നാട്ടുകാര് ചൂണ്ടിക്കാണിക്കുന്നു.
ഈ വിഷയത്തില് ഇതുവരെ സമഗ്രമായ ശാസ്ത്രീയ പഠനമോ ഔദ്യോഗിക അന്വേഷണങ്ങളോ നടന്നിട്ടില്ലെന്നത് വലിയ ആശങ്കയ്ക്ക് ഇടയാക്കുന്ന കാര്യമാണ്. സമയബന്ധിതമായ പഠനവും ഇടപെടലും ഉണ്ടായില്ലെങ്കില് ഈ പ്രശ്നം ഭാവിയില് വലിയൊരു പൊതുജനാരോഗ്യ പ്രതിസന്ധിയായി മാറാന് സാധ്യതയുണ്ടെന്ന് ആരോഗ്യ വിദഗ്ധരും ചൂണ്ടിക്കാണിക്കുന്നു.
അതുകൊണ്ട് തന്നെ പരപ്പനങ്ങാടി മുനിസിപ്പാലിറ്റിയിലെ കടലോര മേഖലകളില് ആരോഗ്യ വകുപ്പ്, മെഡിക്കല് വിദഗ്ധര്, പരിസ്ഥിതി ശാസ്ത്രജ്ഞര് എന്നിവരുടെ നേതൃത്വത്തില് അടിയന്തരമായി സമഗ്ര ആരോഗ്യ സര്വേയും ശാസ്ത്രീയ പഠനവും നടത്തേണ്ടത് അനിവാര്യമാണ്.
ഈ സാഹചര്യത്തില് കേരളത്തിന്റെ മുഖ്യ മന്ത്രി, ആരോഗ്യ വകുപ്പ് മന്ത്രി, തദ്ദേശ സ്വയംഭരണ വകുപ്പ് മന്ത്രി എന്നിവരും പരപ്പനങ്ങാടി മുനിസിപ്പാലിറ്റി ഭരണസമിതിയും വിഷയത്തില് അടിയന്തരമായി ഇടപെട്ട് അന്വേഷണം ആരംഭിക്കണമെന്ന് പരപ്പനങ്ങാടി സിപിഐ ലോക്കല് കമ്മിറ്റി ആവശ്യപ്പെട്ടു.
രോഗബാധിത പ്രദേശങ്ങളില് പ്രത്യേക മെഡിക്കല് ക്യാമ്പുകള് സംഘടിപ്പിക്കുകയും കിഡ്നി രോഗങ്ങളുടെ പ്രാഥമിക പരിശോധനകള് വ്യാപകമാക്കുകയും ആവശ്യമായവര്ക്ക് സൗജന്യ ചികിത്സയും ഡയാലിസിസ് സൗകര്യങ്ങളും ഉറപ്പാക്കുകയും ചെയ്യേണ്ടതുണ്ട്. കൂടാതെ കടലോര മേഖലയിലെ കുടിവെള്ള സ്രോതസുകള് അടിയന്തരമായി പരിശോധിച്ച് ജനങ്ങള്ക്ക് സുരക്ഷിതമായ കുടിവെള്ളം ഉറപ്പാക്കുന്നതിനും സര്ക്കാര് നടപടി സ്വീകരിക്കണം.
ആരോഗ്യ മേഖലയിലെ വിദഗ്ധരെ ഉള്പ്പെടുത്തി യഥാര്ത്ഥ കാരണങ്ങള് കണ്ടെത്തി ദീര്ഘകാല പ്രതിവിധികള് നടപ്പിലാക്കേണ്ടതും അത്യാവശ്യമാണ്.
ഒരു പ്രദേശത്ത് ഇത്തരത്തില് കിഡ്നി രോഗികള് വര്ധിക്കുന്നത് സാധാരണ സംഭവമല്ല. ജനങ്ങളുടെ ആരോഗ്യത്തെ ബാധിക്കുന്ന ഇത്തരം വിഷയങ്ങളില് സര്ക്കാര് അടിയന്തരമായി ഇടപെട്ട് ശാസ്ത്രീയ പഠനം നടത്തി യഥാര്ത്ഥ കാരണങ്ങള് കണ്ടെത്തണമെന്ന് ലോക്കല് സെക്രട്ടറി സകരിയ കേയി ആവശ്യപ്പെട്ടു. ജനങ്ങളുടെ ആരോഗ്യവും ജീവനും സംബന്ധിക്കുന്ന ഈ ഗൗരവകരമായ വിഷയത്തില് സര്ക്കാര് ഉടന് ശ്രദ്ധ പതിപ്പിച്ച് ഫലപ്രദമായ നടപടികള് സ്വീകരികേണ്ടതിന്റ പ്രാധാന്യം മനസ്സിലാക്കി മുഖ്യമന്ത്രി, ആരോഗ്യ വകുപ്പ് മന്ത്രി, തദ്ദേശ സ്വയം ഭരണ വകുപ്പ് മന്ത്രി, പരപ്പനങ്ങാടി മുനിസിപ്പാലിറ്റി ചെയര്മാന് എന്നിവര്ക്ക് സിപിഐ പരപ്പനങ്ങാടി ലോക്കല് കമ്മിറ്റി നിവേദനം നല്കി.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
