മുസ്ലീം, ക്രിസ്ത്യന്, ബുദ്ധ, സിഖ്, പാഴ്സി, ജൈന് എന്നീ ന്യൂനപക്ഷ മതവിഭാഗത്തില്പ്പെടുന്ന വിധവകള്/ വിവാഹബന്ധം വേര്പ്പെടുത്തിയ/ഉപേക്ഷിക്കപ്പെട്ട സ്ത്രീകള് എന്നിവര്ക്കുള്ള ”ഇമ്പിച്ചി ബാവ ഭവന പുനരുദ്ധാരണ പദ്ധതിയില്” ധനസഹായത്തിന് ന്യൂനപക്ഷക്ഷേമ വകുപ്പ് അപേക്ഷ ക്ഷണിച്ചു.
ശരിയായ ജനലുകള് / വാതിലുകള് / മേല്ക്കൂര / ഫ്ളോറിംങ് / ഫിനിഷിംങ് / പ്ലംബിംങ് / സാനിട്ടേഷന് / വൈദ്യൂതീകരണം എന്നിവയില്ലാത്ത വീടുകളുടെ അടിസ്ഥാന സൗകര്യം മെച്ചപ്പെടുത്തുന്നതിനാണ് ധനസഹായം. ഒരു വീടിന്റെ അറ്റകുറ്റപ്പണിക്ക് 50,000 രൂപയാണ് സഹായം. ഇത് തിരിച്ചടക്കേണ്ടതില്ല. അപേക്ഷകയുടെ സ്വന്തം/പങ്കാളിയുടെ പേരിലുള്ള വീടിന്റെ പരമാവധി വിസ്തീര്ണ്ണം 1200 സ്ക്വ. ഫീറ്റ് കവിയരുത്. അപേക്ഷക കുടുംബത്തിലെ ഏക വരുമാനദായകയായിരിക്കണം. ബി.പി.എല് കുടുംബത്തിന് മുന്ഗണന. അപേക്ഷകയ്ക്കോ, മക്കള്ക്കോ, ശാരീരിക മാനസിക വെല്ലുവിളി നേരിടുന്നവര്, പെണ്കുട്ടികള് മാത്രമുള്ള അപേക്ഷക തുടങ്ങിയവര്ക്ക് മുന്ഗണന നല്കും. സര്ക്കാര്/ അര്ധ സര്ക്കാര് സ്ഥാപനങ്ങളില് സ്ഥിര വരുമാനം ലഭിക്കുന്ന മക്കളുള്ള വിധവകള്, സര്ക്കാരില് നിന്നോ സമാന ഏജന്സികളില് നിന്നോ ഇതിന് മുമ്പ് 10 വര്ഷത്തിനുള്ളില് ഭവന നിര്മ്മാണത്തിന് സഹായം ലഭിച്ചവര് എന്നിവര് അപേക്ഷിക്കേണ്ടതില്ല.
വകുപ്പ് പ്രത്യേകം തയ്യാറാക്കിയ അപേക്ഷാ ഫോം മുഖേനയാണ് അപേക്ഷിക്കേണ്ടത്. 2023-24 സാമ്പത്തിക വര്ഷം ഭൂമിയുടെ കരം ഒടുക്കിയ രസീതിന്റെ പകര്പ്പ്, റേഷന് കാര്ഡിന്റെ പകര്പ്പ് എന്നിവയോടൊപ്പം വീട് അറ്റകുറ്റപ്പണി ചെയ്യേണ്ടതിനും, വീടിന്റെ വിസ്തീര്ണ്ണം 1200 സ്ക്വ.ഫീറ്റില് കുറവാണ് എന്ന് സാക്ഷ്യപ്പെടുത്തുന്നതിനും, വില്ലേജ് ഓഫീസര്/തദ്ദേശ സ്വയംഭരണ സ്ഥാപനത്തിന്റെ അസിസ്റ്റന്റ് എഞ്ചിനീയര്/ബന്ധപ്പെട്ട അധികാരികള് എന്നിവരില് ആരുടെയെങ്കിലും സാക്ഷ്യപത്രം മതിയാകും. മറ്റു വകുപ്പുകളില് നിന്നോ, സമാന ഏജന്സികളില് നിന്നോ അപേക്ഷകയ്ക്ക് ഭവന പുനരുദ്ധാരണത്തിനും 10 വര്ഷത്തിനുള്ളില് ഭവന നിര്മ്മാണത്തിനും ആനുകൂല്യം ലഭിച്ചിട്ടില്ലെന്ന് തെളിയിക്കുന്ന സര്ട്ടിഫിക്കറ്റ് ബന്ധപ്പെട്ട വില്ലേജ് എക്സ്റ്റഷന് ഓഫീസര്/ പഞ്ചായത്ത് സെക്രട്ടറി/ എന്നിവരില് ആരുടെയെങ്കിലും പക്കല് നിന്നുള്ളത് വേണം. പൂരിപ്പിച്ച അപേക്ഷ അനുബന്ധ രേഖകള് സഹിതം അതാത് ജില്ലാ കളക്ടറേറ്റിലെ ന്യൂനപക്ഷക്ഷേമ സെക്ഷനില് നേരിട്ടോ, ഡെപ്യൂട്ടി കളക്ടര് (ജനറല്), ജില്ലാ ന്യൂനപക്ഷക്ഷേമ സെക്ഷന്, ജില്ലാ കളക്ടറേറ്റ് എന്ന വിലാസത്തില് അതാത് ജില്ലാ കളക്ടറേറ്റിലേയ്ക്ക് തപാലിലോ അയക്കണം. അപേക്ഷാ ഫോം www.minoritywelfare.kerala.gov.in എന്ന വെബ്സൈറ്റില് ലഭിക്കും. അപേക്ഷകള് ജൂലൈ 31 വരെ അതാത് ജില്ലാ കളക്ടറേറ്റുകളില് സ്വീകരിക്കും.
