സംസ്ഥാനത്ത് അടുത്ത 5 ദിവസങ്ങളില് ശക്തമായ മഴക്ക് സാധ്യതയെന്നാണ് കേന്ദ്ര കാലാവസ്ഥാവകുപ്പിന്റെ അറിയിപ്പ്. ഇന്ന് ഏഴ് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില് നാളെ ഓറഞ്ച് അലര്ട്ടാണ് പ്രഖ്യാപിച്ചിരിക്കുന്നത്. സംസ്ഥാനത്തെ ഇക്കോ ടൂറിസം കേന്ദ്രങ്ങളില് ഇനി ഒരറിയിപ്പ് ഉണ്ടാകുന്നത് വരെ വിലക്കേര്പ്പെടുത്തിയിട്ടുണ്ട്.
കോട്ടയം ജില്ലയുടെ കിഴക്കന് മേഖലയില് കനത്ത മഴ തുടരുകയാണ്. പത്തനംതിട്ട, ഇടുക്കി ജില്ലകളിലും മഴ ശക്തമാണ്. മീനച്ചില്, മണിമല നദികളില് ജലനിരപ്പ് ഉയരുകയാണ്. സമീപ പ്രദേശങ്ങളില് താമസിക്കുന്നവര് ജാഗ്രത പാലിക്കണമെന്ന് മന്ത്രി റോഷി അഗസ്റ്റിന് അറിയിച്ചു.
മീനച്ചില്, കാഞ്ഞിരപ്പള്ളി താലൂക്ക് പരിധിയില് വരുന്ന ഗ്രാമപഞ്ചായത്തുകളില് ജാഗ്രത പുലര്ത്താന് കോട്ടയം ജില്ലാ കളക്ടര് വിവിധ വകുപ്പുകള്ക്ക് നിര്ദ്ദേശം നല്കി. എല്ലാ തദ്ദേശസ്വയംഭരണ സ്ഥാപനങ്ങളിലും കണ്ട്രോള് റൂം പ്രവര്ത്തനം ആരംഭിക്കാന് കളക്ടര് നിര്ദ്ദേശം നല്കി
ഇന്നലെ മുതല് നിര്ത്താതെ പെയ്ത മഴയില് വ്യാപക നാശനഷ്ടമുണ്ടായി. കോട്ടയം, പത്തനംതിട്ട, കൊല്ലം ജില്ലകളില് മണ്ണിടിച്ചിലും ഉരുള്പൊട്ടലും ഉണ്ടായി. ശക്തമായ മഴയില് പലയിടത്തും ഉരുള്പൊട്ടി. കൊല്ലത്തും പത്തനംതിട്ടയിലുമായി രണ്ട് പേര് ഒഴുക്കില്പ്പെട്ട് മരിച്ചു. കൊല്ലം കുഭവരട്ടി വെള്ളച്ചാട്ടത്തില് കുളിക്കാനിറങ്ങിയ തമിഴ്നാട് മധുരൈ സ്വദേശി കുമാരനും പത്തനംതിട്ട കൊല്ലമുളയില് അദ്വൈദ് എന്ന യുവാവുമാണ് മരിച്ചത്. കോട്ടയം വാകക്കാട് രണ്ടാറ്റുമുന്നിയില് പാലം വെള്ളത്തിനടിയിലായി. മൂന്നിലവ് ടൗണും വെള്ളത്തിനടിയിലായി. മുണ്ടക്കയം എരുമേലി സംസ്ഥാന പാതയില് തോട് കരകവിഞ്ഞ് ഗതാഗതം തടസ്സപ്പെട്ടു. ഇടുക്കി മൂലമറ്റത്ത് ഉരുള്പൊട്ടിയതായി സംശയമുണ്ട്. മൂന്നുങ്കവയല്, മണപ്പാടി എന്നിവിടങ്ങളിലെ താഴ്ന്ന പ്രദേശങ്ങളില് വെള്ളം കയറി. തിരുവനന്തപുരം കല്ലാര് മീന്മുട്ടിയില് കുടുങ്ങിയ വിനോദ സഞ്ചാരികളെ രക്ഷിച്ചു. നെയ്യാര് ഡാമിന്റെ ഷട്ടര് ഉയര്ത്തിയതിനാല് തീരദേശത്ത് താമസിക്കുന്നവര്ക്ക് ജാഗ്രതാ നിര്ദ്ദേശമുണ്ട്. പാലക്കാട് കാഞ്ഞിരപ്പുഴ ഡാമിന്റെയും സ്പില്വേ ഷട്ടറുകള് ഉയര്ത്തിയിട്ടുണ്ട്.
