തിരുവനന്തപുരം: എല്പിജി ഉടമകള് ഗ്യാസ് ഏജന്സിയിലെത്തി മസ്റ്ററിങ് പൂര്ത്തിയാക്കണമെന്ന കേന്ദ്ര സര്ക്കാര് നിര്ദ്ദേശം വയോധികരും സ്ത്രീകളും ഉള്പ്പെടെയുള്ളവര്ക്കുണ്ടാക്കുന്ന ബുദ്ധിമുട്ട് ചൂണ്ടിക്കാട്ടി കേന്ദ്ര പെട്രോളിയം പ്രകൃതിവാതക വകുപ്പ് മന്ത്രിക്ക് പ്രതിപക്ഷ നേതാവ് കത്തയച്ചു. ഗ്യാസ് ഏജന്സികളില് ഉണ്ടാകുന്ന തിരക്കും ഉപഭോക്താക്കള്ക്കുണ്ടാകുന്ന ബുദ്ധിമുട്ടും ഒഴിവാക്കാന് വാര്ഡ് തലത്തിലും അക്ഷയ കേന്ദ്രങ്ങളിലും മസ്റ്ററിങിനായി പ്രത്യേക സംവിധാനം ഒരുക്കണമെന്നും പ്രതിപക്ഷ നേതാവ് ആവശ്യപ്പെട്ടു.
എല്പിജി ഗ്യാസ് സിലിണ്ടര് യഥാര്ത്ഥ ഉപഭോക്താവിന്റെ കൈയ്യില് തന്നെ ആണോയെന്ന് പരിശോധിച്ച് ഉറപ്പിക്കാനാണ് മസ്റ്ററിംഗ് നിര്ബന്ധമാക്കിയിരിക്കുന്നത്. ആധാര് വിവരങ്ങള് എല്പിജി കണക്ഷനുമായി ബന്ധിപ്പിക്കുന്നതാണ് ഇലക്ട്രോണിക് കെ വൈ സി അഥവാ മസ്റ്ററിംഗ്. ഉപഭോക്താവ് നേരിട്ടെത്തി ബയോ മെട്രിക് പഞ്ചിംഗ് വഴി വിശദ വിവരങ്ങള് രജിസ്റ്റര് ചെയ്യണം. ഗ്യാസ് കണക്ഷന് ബുക്ക്, ആധാര് കാര്ഡ്, റേഷന് കാര്ഡ് എന്നിവയും കയ്യില് വേണം. ഒപ്പം ഗ്യാസ് കണക്ഷന് രജിസ്റ്റര് ചെയ്ത നമ്പറും. ഇത് വഴി സര്ക്കാര് ആനുകൂല്യങ്ങള് മുടക്കമില്ലാതെ കിട്ടാനും തട്ടിപ്പുകള് തടയാനുമാണ് ലക്ഷ്യമിടുന്നത്.
ഇന്ധന കമ്പനികള് മസ്റ്ററിംഗ് നടപടികള് തുടങ്ങിയിട്ട് രണ്ട് മാസമായി. തുടക്കത്തില് തണുപ്പന് പ്രതികരണമായിരുന്നു. മസ്റ്ററിംഗ് ക്യാംപുകള് നടത്തിയിട്ടും വലിയ പങ്കാളിത്തമില്ലായിരുന്നു. പ്രധാനമന്ത്രി ഉജ്ജ്വല് യോജന പദ്ധതിയിലുള്ളവര് മാത്രം മസ്റ്ററിംഗ് നടത്തിയാല് മതിയെന്ന പ്രചാരണമാകാം ഇതിന് കാരണമെന്നാണ് ഇന്ധന കമ്പനികളുടെ നിഗമനം. ഇതോടെയാണ് അതങ്ങനെ അല്ല എന്ന് വ്യക്തമാക്കി ഇന്ഡെല്, ഭാരത്, എച്ച് പി കമ്പനികള് രംഗത്തെത്തിയത്. എല്ലാ ഉപഭോക്താക്കളും എത്രയും വേഗം മസ്റ്ററിംഗ് നടത്തണം. ഉപഭോക്താവ് വിദേശത്തോ മരിച്ച് പോയതോ കിടപ്പ് രോഗിയോ എങ്കില് കണക്ഷന് റേഷന് കാര്ഡിലുള്ള മറ്റൊരാളുടെ പേരിലേക്ക് മാറ്റണം.
നേരിട്ടെത്താന് കഴിയാത്തവര്ക്ക് ഇന്ധന വിതരണ കമ്പനികളുടെ ആപ്പിലൂടെയും മസ്റ്ററിംഗ് നടത്താം. കമ്പനികളുടെ മൊബൈല് ആപ്പ്, ആധാര് ഫേസ് റെക്കഗിനേഷന് ആപ്പ് എന്നിവ ഡൗണ്ലോഡ് ചെയ്യണം. നടപടികള് ശരിയാണെങ്കില് മൊബൈലിലേക്ക് മെസേജ് എത്തും. മസ്റ്ററിംഗ് പൂര്ത്തിയാക്കേണ്ട അവസാന തിയതി ഉടന് പ്രഖ്യാപിക്കുമെന്നാണ് സൂചന.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
