അടിസ്ഥാന ഭൂനികുതി പരിഷ്കരിക്കുമെന്ന് ധനമന്ത്രി കെഎന് ബാലഗോപാല്. എല്ലാ സ്ലാബുകളിലെയും അടിസ്ഥാന ഭൂനികുതി നിരക്കുകള് വര്ധിപ്പിക്കും. ഇതിലൂടെ ഏകദേശം 80 കോടി രൂപയുടെ അധികവരുമാനം ഉണ്ടാകുമെന്ന് പ്രതീക്ഷിക്കുന്നതായും മന്ത്രി പറഞ്ഞു. ആഭ്യനന്തരനികുതി വരുമാനം വര്ധിച്ചിട്ടുണ്ടെന്നും അദ്ദേഹം പറഞ്ഞു. ഭൂമിയുടെ ന്യായവില പത്ത് ശതമാനം വര്ധിപ്പിക്കും. ഭൂമിയുടെ ന്യായവില പല പ്രദേശങ്ങളിലും നിലവിലുള്ള വിപണിമൂല്യവുമായി പൊരുത്തപ്പെടുന്നില്ല. ഭൂമിയുടെ ന്യായവിലയിലെ അപാകതകള് പരിശോധിക്കാനും പരിഹരിക്കാനും ഉന്നതതല സമിതി രൂപീകരിക്കും. എല്ലാ വിഭാഗങ്ങളിലും നിലവിലുള്ള ന്യായവിലയില് പത്ത് ശതമാനം ഒറ്റത്തവണ വര്ധനവ് നടപ്പിലാക്കുമെന്നും അദ്ദേഹം വ്യക്തമാക്കി.
200 കോടിയുടെ അധിക വരുമാനമാണ് പ്രതീക്ഷിക്കുന്നത്. ഗ്രാമപഞ്ചായത്ത്, മുനിസിപ്പാലിറ്റികള്, കോര്പ്പറേഷനുകള് എന്നിവിടങ്ങളില് 40.476 നു മുകളില് പുതിയ സ്ളാബ് ഏര്പ്പെടുത്തി അടിസ്ഥാന ഭൂനികുതി പരിഷകരിക്കുമെന്നും അദ്ദേഹം പറഞ്ഞു.
339 കോടി രൂപ ചിലവില് ഡിജിറ്റല് ഭൂസര്വ്വേ പദ്ധതി ഉള്പ്പടെ അത്യാധുനിക സാങ്കേതിക മാറ്റങ്ങള് കൊണ്ടുവരുന്നതിനുള്ള പദ്ധതികളും ഒന്നാംഘട്ടമായി സര്ക്കാര് നടപ്പിലാക്കിവരികയാണ്. ദേശീയപാത വികസനം, മെട്രോ റെയില് പദ്ധതി, കോര് റോഡ് ശൃംഖല വിപുലീകരണം തുടങ്ങിയ അടിസ്ഥാന സൗകര്യ പദ്ധതികള് സര്ക്കാര് ഏറ്റെടുത്തിട്ടുണ്ട്. ഇതിന്റെ ഫലമായി സമീപപ്രദേശങ്ങളില് വിപണിമൂല്യം പലമടങ്ങ് വര്ധിച്ചെന്നും മന്ത്രി അറിയിച്ചു.
