കൊച്ചി: നടിയെ ആക്രമിച്ച കേസുമായി ബന്ധപ്പെട്ട് നടന് ദിലീപിന്റെ വീട്ടിലും സ്ഥാപനത്തിലും ക്രൈംബ്രാഞ്ച് നടത്തിയ പരിശോധന അവസാനിച്ചു. ഏഴ് മണിക്കൂര് നീണ്ട പരിശോധനയില് ഹാര്ഡ് ഡിസ്കകളും മൊബൈല് ഫോണുകളും കസ്റ്റഡിയില് എടുത്തു. ദിലീപിന്റെ മൊബൈല് ഫോണും കസ്റ്റഡിയിലെടുത്തതായാണ് വിവരം. ക്രൈംബ്രാഞ്ച് എസ് പിയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് പരിശോധന നടത്തിയത്. ദിലീപിന്റെ ഭാര്യ കാവ്യ മാധവന്റെ മാതാപിതാക്കളെ പൊലീസ് വിളിച്ചു വരുത്തി.
ആലുവ പറവൂര്ക്കവലയിലെ ദിലീപിന്റെ വീട്, സഹോദരന് അനൂപിന്റെ വീട്, ദിലീപിന്റെയും അനൂപിന്റെയും സിനിമാനിര്മാണക്കമ്പനി ഗ്രാന്ഡ് പ്രൊഡക്ഷന്സിന്റെ കൊച്ചി ചിറ്റൂര് റോഡിലുള്ള ഓഫീസ് എന്നിവിടങ്ങളിലാണ് ഒരേ സമയം റെയ്ഡുകള് നടന്നത്. ഇതില് ദിലീപിന്റെ വീട്ടിലെ റെയ്ഡ് മാത്രമാണ് പൂര്ത്തിയായത്.
ഉദ്യോഗസ്ഥരെ അപായപ്പെടുത്താന് ശ്രമിച്ചുവെന്ന വെളിപ്പെടുത്തലില് ദിലീപിന്റെ കയ്യില് തോക്ക് ഉണ്ടായിരുന്നുവെന്ന് സംവിധായകന് ബാലചന്ദ്രകുമാര് പറഞ്ഞിരുന്നു. ഇതിന്റെ അടിസ്ഥാനത്തില് തോക്ക് കണ്ടെത്താനുള്ള ശ്രമവും നടന്നു. എന്നാല് തോക്ക് കണ്ടെടുക്കാന് സാധിച്ചിട്ടില്ലെന്നാണ് നിലവില് ലഭിച്ച വിവരം. ഇതോടൊപ്പം നടിയെ ആക്രമിച്ച് പള്സര് സുനി പകര്ത്തിയ ദൃശ്യങ്ങള് ആലുവയിലെ വീട്ടിലിരുന്ന് ദിലീപ് കണ്ടുവെന്ന് ബാലചന്ദ്രകുമാര് വെളിപ്പെടുത്തിയതിന്റെ അടിസ്ഥാനത്തില് ഈ ദൃശ്യങ്ങള്ക്ക് വേണ്ടി സൈബര് വിദഗ്ധരും തെരച്ചില് നടത്തി.
അന്വേഷണസംഘത്തെ ആക്രമിക്കാന് ഗൂഢാലോചന നടത്തിയതുമായി ബന്ധപ്പെട്ട് ദിലീപിന്റെ മുന്കൂര് ജാമ്യഹര്ജി നാളെ ഹൈക്കോടതി പരിഗണിക്കാനിരിക്കുകയാണ്. ഇതിന് മുന്നോടിയായാണ് വ്യാപകപരിശോധന. ഒരു കാരണവശാലും ദിലീപിന് മുന്കൂര് ജാമ്യം അനുവദിക്കരുതെന്ന് അന്വേഷണസംഘം കോടതിയില് വാദിക്കും. ഇതിനായുള്ള തെളിവുകള് ശേഖരിക്കാനാണ് പരിശോധന. ഒന്നാം പ്രതി ദിലീപ്, സഹോദരന് അനൂപ്, സഹോദരീഭര്ത്താവ് സുരാജ് എന്നിവരാണ് ഹൈക്കോടതിയില് മുന്കൂര് ജാമ്യാപേക്ഷ നല്കിയിരിക്കുന്നത്.
രാവിലെ 11.30-യോടെയാണ് ദിലീപിന്റെ വീട്ടിലേക്ക് അന്വേഷണഉദ്യോഗസ്ഥരെത്തിയത്. കുറേ നേരം കാത്ത് നിന്നിട്ടും ‘പത്മസരോവര’ത്തിന്റെ ഗേറ്റ് തുറന്നുകൊടുക്കാന് വീട്ടിനകത്തുള്ള ആളുകള് തയ്യാറായില്ല. പരിശോധനയ്ക്ക് എത്തിയ ക്രൈംബ്രാഞ്ച് ഉദ്യോഗസ്ഥരാണെന്ന് പറഞ്ഞിട്ടും ഗേറ്റ് തുറന്നില്ല. പിന്നീട് ഉദ്യോഗസ്ഥര് ഗേറ്റ് ചാടിക്കടന്ന് അകത്ത് കയറുകയായിരുന്നു. പിന്നീട് ദിലീപിന്റെ സഹോദരി വന്ന് ദിലീപിന്റെ വീട് തുറന്നുകൊടുത്തു. അന്വേഷണ ഉദ്യോഗസ്ഥരെത്തിയപ്പോള് വീട്ടില് ദിലീപ് ഉണ്ടായിരുന്നില്ല. റെയ്ഡ് തുടങ്ങി അരമണിക്കൂറിനകമാണ് വെള്ള ഇന്നോവ കാറില് ദിലീപ് എത്തിയത്. റെയ്ഡ് തുടങ്ങിയ ഉടന് സഹോദരന് അനൂപും സ്ഥലത്ത് എത്തി.
