തദ്ദേശ സ്വയംഭരണ സ്ഥാപനങ്ങളിലേക്കുളള നാമനിര്ദേശ പത്രികകള് പിന്വലിക്കാനുള്ള സമയ പരിധി ഇന്ന് അവസാനിക്കും. മൂന്ന് മണി വരെയാണ് പത്രിക പിന്വലിക്കാനുള്ള സമയം. ഇതിന് ശേഷം സംസ്ഥാന തെരഞ്ഞെടുപ്പ് കമ്മീഷന് അന്തിമ പട്ടിക തയ്യാറാക്കും.ഇതോടെ മത്സര രംഗത്ത് ആരൊക്കെയെന്ന ചിത്രം ഇന്ന് വൈകീട്ടോടെ തെളിയും.
പിന്വലിക്കാനുള്ള സമയം അവസാനിച്ചാല് വരണാധികാരികള് സ്ഥാനാര്ത്ഥി പട്ടിക നോട്ടീസ് ബോര്ഡുകളില് ഇടും. പട്ടികയുടെ ഒരു പകര്പ്പ് സ്ഥാനാര്ത്ഥിക്കോ തെരഞ്ഞെടുപ്പ് ഏജന്റിനോനല്കും. സ്ഥാനാര്ത്ഥികളുടെ പേരുകള് മലയാളം അക്ഷരമാല ക്രമത്തില് ക്രമീകരിച്ചാകും പട്ടിക തയാറാക്കുക. സ്ഥാനാര്ത്ഥിയുടെ പേരിനൊപ്പം വിലാസവും മല്സരിക്കുന്ന ചിഹ്നവും ഉണ്ടാവും. ഓരോ സ്ഥാനാര്ഥിക്കും റിട്ടേണിങ് ഓഫീസര് സാക്ഷ്യപ്പെടുത്തിയ തിരിച്ചറിയല് കാര്ഡും നല്കും.
സ്ഥാനാര്ത്ഥികള്ക്ക് അവരെ തിരിച്ചറിയുന്നതിന് പേരിനൊപ്പം കൂട്ടിച്ചേര്ക്കലുകള് വരുത്താം. നാട്ടില് അറിയപ്പെടുന്ന പേരോ ജോലിസംബന്ധമായ വിശേഷണങ്ങളോ കൂട്ടിചേര്ക്കാന് വരണാധികാരിക്ക് അപേക്ഷ നല്കാം. ഒന്നരലക്ഷത്തിലധികം സ്ഥാനാര്ത്ഥികളാണ് നാമനിര്ദേശ പത്രിക സമര്പ്പിച്ചിരുന്നത്. പലയിടങ്ങളിലും വിമത സ്ഥാനാര്ത്ഥികളും അപരന്മാരും മൂന്ന് മുന്നണികള്ക്കും ഏറെയുണ്ട് . വിമതരെ പിന്തിരിപ്പിക്കാനുള്ള ശ്രമത്തിലാണ് മുന്നണികള്.
