തിരുവനന്തപുരം: 73 ലോക രാജ്യങ്ങളില് കോവിഡ് 19 രോഗം പടര്ന്നു പിടിച്ച സാഹചര്യത്തില് സംസ്ഥാനത്തെ വിവിധ ജില്ലകളിലായി 469 പേര് നിരീക്ഷണത്തിലാണെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. ഇവരില് 438 പേര് വീടുകളിലും 31 പേര് ആശുപത്രികളിലും നിരീക്ഷണത്തിലാണ്. വീട്ടിലെ നിരീക്ഷണത്തില് കഴിയുന്ന 11 വ്യക്തികളെ പരിഷ്കരിച്ച മാര്ഗരേഖ പ്രകാരം ബുധനാഴ്ച ഒഴിവാക്കിയിട്ടുണ്ട്. സംശയാസ്പദമായവരുടെ 552 സാമ്പിളുകള് എന്.ഐ.വി.യില് പരിശോധനയ്ക്ക് അയച്ചിട്ടുണ്ട്. ഇതില് 511 സാമ്പിളുകളുടെ പരിശോധനാ ഫലം നെഗറ്റിവ് ആണ്. നിലവില് ആശുപത്രിയില് പ്രവേശിപ്പിക്കപ്പെട്ട ആരുടേയും ആരോഗ്യനിലയില് ആശങ്കയ്ക്ക് വകയില്ലെന്നും മന്ത്രി വ്യക്തമാക്കി.
ഇന്ത്യയിലെ പല സംസ്ഥാനങ്ങളിലും കൊറോണ വൈറസ് കേസുകള് റിപ്പോര്ട്ട് ചെയ്യപെട്ട സാഹചര്യത്തില് കേന്ദ്ര ആരോഗ്യ മന്ത്രാലയത്തിലെ കാബിനറ്റ് സെക്രട്ടറി രാജീവ് ഗാവ്ബ എല്ലാ സംസ്ഥാനങ്ങളിലേയും ഉദ്യോഗസ്ഥരുമായി വീഡിയോ കോണ്ഫറന്സ് നടത്തി. ഈ മീറ്റിംഗില് കേരളത്തിന്റെ പ്രവര്ത്തനങ്ങളെ അഭിനന്ദിക്കുകയും കൊറോണ നിയന്ത്രണതിനായുള്ള മാര്ഗരേഖകള് പിന്തുടരാന് മറ്റു സംസ്ഥാനങ്ങളോട് ആവശ്യപ്പെടുകയും ചെയ്തു. മറ്റു സംസ്ഥാനങ്ങള്ക്ക് സാങ്കേതിക പിന്തുണ ആവശ്യമെങ്കില് നല്കാന് തയ്യാറാണെന്ന് ആരോഗ്യ വകുപ്പ് പ്രിന്സിപ്പല് സെക്രട്ടറി അറിയിച്ചിട്ടുണ്ട്.
ഇറ്റലിയിലും ഇറാനിലും പുതിയ കേസുകള് റിപ്പോര്ട്ട് ചെയ്യപ്പെടുന്നതും രോഗം വ്യാപിക്കുന്നതും കണക്കിലെടുത്ത് ചൈന, ഹോങ്കോംഗ്, തായ്ലന്ഡ്, സിംഗപ്പൂര്, ജപ്പാന്, ദക്ഷിണ കൊറിയ, വിയറ്റ്നാം, നേപ്പാള്, ഇന്തോനേഷ്യ, മലേഷ്യ എന്നിവയ്ക്ക് പുറമേ ഇറാന്, ഇറ്റലി എന്നിവിടങ്ങളില് നിന്ന് നേരിട്ടുള്ള ഫ്ലൈറ്റുകളിലൂടെ വരുന്ന യാത്രക്കാരെ കൂടി പരിശോധിക്കാന് തീരുമാനിച്ചു. ഈ രാജ്യങ്ങളില് നിന്നും വരുന്ന എല്ലാ ആളുകളും നിര്ദ്ദേശങ്ങള് പാലിക്കണം. റിപ്പബ്ലിക് ഓഫ് കൊറിയ, ഇറാന്, ഇറ്റലി എന്നിവിടങ്ങളില് നിന്ന് വരുന്നവരോ, 2020 ഫെബ്രുവരി 10 മുതല് അത്തരം യാത്രാ ചരിത്രമുള്ളവരോ ഇന്ത്യയിലെത്തുമ്പോള് 14 ദിവസത്തേക്ക് നിരീക്ഷണത്തില് തുടരണം. രോഗ ലക്ഷണമില്ലാത്തവര് 14 ദിവസം വീടുകളില് നിരീക്ഷണത്തില് തുടരണം. രോഗലക്ഷണമുള്ളവര് ജില്ലകളിലെ ഐസോലേഷന് സൗകര്യമുള്ള ആശുപത്രികളുമായി ബന്ധപ്പെടണം.
