തിരുവനന്തപുരം: എറണാകുളം മെഡിക്കല് കോളേജില് ചികിത്സയിലുള്ള മൂന്ന് വയസുള്ള കുട്ടിയുടെ മാതാപിതാക്കള്ക്ക് കോവിഡ് 19 സ്ഥിരീകരിച്ചതായി ആരോഗ്യ മന്ത്രി കെ.കെ. ശൈലജ ടീച്ചര് പറഞ്ഞു. പത്തനംതിട്ടയില് രോഗബാധ സ്ഥിരീകരിച്ച വ്യക്തികളുമായി സമ്പര്ക്കമുണ്ടായിരുന്ന പത്തനംതിട്ട ജില്ലയിലെ 4 പേര്ക്കും കോട്ടയം ജില്ലയിലെ 2 പേര്ക്കും കൂടി നേരത്തെ കോവിഡ് 19 സ്ഥിരീകരിച്ചിരുന്നു. ഇതോടെ സംസ്ഥാനത്ത് 14 പേര്ക്ക് കോവിഡ് 19 ബാധിച്ചതായി മന്ത്രി പറഞ്ഞു.
കോട്ടയം മെഡിക്കല് കോളേജില് ചികിത്സയിലുള്ള 85 വയസിന് മുകളില് പ്രായമുള്ള രണ്ട് പേര് ഹൈ റിസ്കിലുള്ളവരാണ്. നിലവില് ആശുപത്രിയില് പ്രവേശിപ്പിക്കപ്പെട്ടവരുടെ ആരോഗ്യനിലയില് ആശങ്ക വേണ്ടെന്ന് മന്ത്രി വ്യക്തമാക്കി. ആരോഗ്യ വകുപ്പിന്റെ അവലോകന യോഗത്തിന് ശേഷം മാധ്യമങ്ങളോടു സംസാരിക്കുകയായിരുന്നു മന്ത്രി. ഭയപ്പെടേണ്ട കാര്യമില്ലെന്നും എല്ലാവരും സഹകരിച്ച് പ്രവര്ത്തിക്കണമെന്നും മന്ത്രി അഭ്യര്ത്ഥിച്ചു. സംസ്ഥാനത്തെ വിവിധ ജില്ലകളിലായി 1495 പേര് നിരീക്ഷണത്തിലാണ്. ഇതില് 1236 പേര് വീടുകളിലും 259 പേര് ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 980 സാമ്പിളുകള് എന്.ഐ.വി.യില് പരിശോധനയ്ക്ക് അയച്ചതില് 815 സാമ്പിളുകളുടെ പരിശോധനാ ഫലം നെഗറ്റിവ് ആണ്. തിരുവനന്തപുരം, കോഴിക്കോട് മെഡിക്കല് കോളേജുകളില് പരിശോധനാ സംവിധാനം ഏര്പ്പെടുത്തിയിട്ടുണ്ട്. കോഴിക്കോട് മെഡിക്കല് കോളേജില് 9 പരിശോധനകള് നടത്തി. അവയെല്ലാം നെഗറ്റീവാണ്. തിരുവനന്തപുരത്ത് ബുധനാഴ്ച മുതല് പരിശോധന തുടങ്ങും. തൃശൂര് മെഡിക്കല് കോളേജിലും രാജീവ് ഗാന്ധി ബയോടെക്നോളജി സെന്ററിലുംസംസ്ഥാന പബ്ളിക് ഹെല്ത്ത് ലാബിലും പരിശോധിക്കാനുള്ള അനുമതി കേന്ദ്രത്തോടു ചോദിച്ചിട്ടുണ്ട്.
മുഖം, മൂക്ക്, കണ്ണുകള് എന്നിവ സ്പര്ശിക്കുന്നത് ഒഴിവാക്കുക. തുമ്മുമ്പോഴും, ചുമയ്ക്കുമ്പോഴും വായും, മൂക്കും തൂവാല കൊണ്ട് മൂടേണ്ടതും, ഇടയ്ക്കിടെ കൈകള് സോപ്പും, വെളളവും ഉപയോഗിച്ച് കഴുകേണ്ടതുമാണ്. കോവിഡ് 19 രോഗലക്ഷണങ്ങള് ഉള്ളവരും അവരെ പരിചരിക്കുന്നവരും മാത്രം മാസ്ക് ധരിച്ചാല് മതിയെന്ന് മന്ത്രി പറഞ്ഞു.
വൈകിട്ടു നടന്ന അവലോകന യോഗത്തില് ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന്. ഖോബ്രഗഡെ, എന്.എച്ച്.എം. സ്റ്റേറ്റ് മിഷന് ഡയറക്ടര് ഡോ. രത്തന് ഖേല്ക്കര്, കെ.എം.എസ്.സി.എല്. എം.ഡി. ഡോ. നവജ്യോത് ഖോസ, ആരോഗ്യ വകുപ്പ് ഡയറക്ടര് ഡോ. ആര്.എല്. സരിത, ആരോഗ്യ വിദ്യാഭ്യാസ വകുപ്പ് ഡയറക്ടര് ഡോ. എ. റംലാബീവി, അഡീ. ഡയറക്ടര്മാരായ ഡോ. വി. മീനാക്ഷി, ഡോ. ബിന്ദു മോഹന്, സ്റ്റേറ്റ് പബ്ലിക് ഹെല്ത്ത് ലാബ് ഡയറക്ടര് ഡോ. സുനിജ, കോവിഡ് 19 സ്റ്റേറ്റ് നോഡല് ഓഫീസര് ഡോ. അമര് ഫെറ്റില്, എസ്.എ.ടി. ആശുപത്രി സൂപ്രണ്ട് ഡോ. എ. സന്തോഷ് കുമാര്, കെസാക്സ് പ്രോജക്ട് ഡയറക്ടര് ഡോ. ആര്. രമേഷ്, എസ്.എച്ച്.എസ്.ആര്.സി. എക്സി. ഡയറക്ടര് ഡോ. കെ.എസ്. ഷിനു, സംസ്ഥാന പകര്ച്ചവ്യാധി പ്രതിരോധ സെല് ഡയറക്ടര് ഡോ. പി.എസ്. ഇന്ദു എന്നിവര് പങ്കെടുത്തു.
