HIGHLIGHTS : Chief Minister consoled Jinto
മലപ്പുറം:മഞ്ചേരിയിലെ നവകേരള സദസ്സ് വേദിയില് മുഖ്യമന്ത്രി പിണറായി വിജയനെ സ്വീകരിക്കാന് നിയുക്തനായ എന്സിസി കേഡറ്റ് ജിന്റോയുടെ കൈ വീശുന്നതിനിടെ അബദ്ധത്തില് മുഖ്യമന്ത്രിയുടെ കണ്ണില് ഇടിച്ചിരുന്നു. കണ്ണടച്ച് സീറ്റിലിരുന്ന മുഖ്യമന്ത്രിയെ അപ്പോള്ത്തന്നെ പരിചരിക്കാന് ജിന്റോ തയ്യാറായി. എന്നാല് എന്സിസി കേഡറ്റിന്റെ കൈതട്ടി മുഖ്യമന്ത്രി അസ്വസ്ഥനായി എന്നാണ് ചിലര് വാര്ത്ത നല്കിയത്. ആ വാര്ത്ത കണ്ട് വിഷമിച്ച വിദ്യാര്ത്ഥി മുഖ്യമന്ത്രിയെ കാണണമെന്ന് താല്പര്യപ്പെടുകയായിരുന്നു.
പി വി അന്വര് എംഎല്എയുടെ വസതിയില് അതിനുള്ള അവസരം ലഭിച്ചു. മുഖ്യമന്ത്രി ജിന്റോയെ വാത്സല്യത്തോടെ സ്വീകരിച്ചു. ‘അബദ്ധത്തില് പറ്റിയതാണെന്ന് എനിക്കറിയാം. വിഷമിക്കേണ്ട. നന്നായി പഠിക്കണം’ എന്ന് പറഞ്ഞ് പേന സമ്മാനമായി നല്കിയാണ് മുഖ്യമന്ത്രി ജിന്റോയെ യാത്രയച്ചത്. ഇന്നലെ രാത്രി തന്നെ മുഖ്യമന്ത്രിയുടെ നിര്ദ്ദേശപ്രകാരം മുഖ്യമന്ത്രിയുടെ ഓഫീസില്നിന്ന് വിളിച്ച് ജിന്റോയെ ആശ്വസിപ്പിച്ചിരുന്നു.
മഞ്ചേരി ബോയ്സ് ഹയര്സെക്കന്ഡറി സ്കൂളിലെ എട്ടാം ക്ലാസ് വിദ്യാര്ത്ഥിയാണ് ജിന്റോ.