HIGHLIGHTS : Chance of summer rain from today
കടുത്ത ചൂടില് കേരളം വെന്തുരുകുമ്പോള് ആശ്വാസമായി ഇന്നുമുതല് വേനല് മഴയ്ക്ക് സാധ്യതയെന്ന് കാലാവസ്ഥാ വകുപ്പിന്റെ പ്രവചനം. ഒറ്റപ്പെട്ട സ്ഥലങ്ങളില് വേനല് മഴ ലഭിക്കും. അടുത്തയാഴ്ചയോടെ ബംഗാള് ഉള്ക്കടലില് ന്യൂനമര്ദം രൂപപ്പെടും. അതോടെ സംസ്ഥാനത്തൊട്ടാകെ വേനല്മഴ ലഭിക്കാന് സാധ്യതയുണ്ടെന്നും കാലാവസ്ഥാ വകുപ്പ് പ്രവചിക്കുന്നു. അന്തരീക്ഷ ആര്ദ്രത കൂടുതലുള്ള പ്രദേശങ്ങളില് മഴ ലഭിക്കും. തെക്കന് കേരളത്തിലാണ് കൂടുതല് സാധ്യത. സംസ്ഥാനത്ത് കൊല്ലം, പത്തനംതിട്ട, ആലപ്പുഴ, എറണാകുളം ജില്ലകളില് ഇന്നു മുതല് നേരിയ മഴയ്ക്കു സാധ്യതയുണ്ടെന്നു കാലാവസ്ഥാ നിരീക്ഷണ കേന്ദ്രം അറിയിച്ചു. അടുത്ത 4 ദിവസങ്ങളില് ഇതു തുടരും.
ഇന്ന് വൈകീട്ടോടെ തിരുവനന്തപുരത്തെ മലയോര മേഖലകളില് മഴക്ക് സാധ്യതയുണ്ട്. മലപ്പുറം, പാലക്കാട് ജില്ലകളിലെ അതിര്ത്തിയിലും മഴ പെയ്യാന് സാധ്യതയുണ്ട്. ഇടുക്കി, കോട്ടയം, പത്തനംതിട്ട ജില്ലകളിലും മഴ ലഭിക്കും. തിരുവനന്തപുരം, കൊല്ലം, ആലപ്പുഴ ജില്ലകളിലെ തീരദേശ മേഖലയിലും മഴക്ക് സാധ്യതയുണ്ട്. മാര്ച്ച് 20വരെ ശരാശരി വേനല്മഴ ലഭിച്ചേക്കും.
സംസ്ഥാനത്ത് താപനില വര്ധിക്കുകയാണ്. കഴിഞ്ഞ 3 ദിവസങ്ങളില് സംസ്ഥാനത്തെ ആറ് ജില്ലകളില് താപനില 40 ഡിഗ്രി സെല്ഷ്യസ് എത്തുമെന്ന് കാലാവസ്ഥാ വകുപ്പ് മുന്നറിയിപ്പ് നല്കിയിരുന്നു. കൊല്ലം ജില്ലയിലെ പുനലൂരിലാണ് ഏറ്റവും ഉയര്ന്ന താപനില (38.8) രേഖപ്പെടുത്തിയത്.