ചണ്ഡീഗഡ്: സുപ്രീംകോടതി ചീഫ് ജസ്റ്റിസ് ബി ആര് ഗവായ്ക്ക് നേരെ ഷൂ എറിയാന് ശ്രമിച്ച കേസില് അഭിഭാഷകന് രാകേഷ് കിഷോറിനെതിരെ കേസ്. ബെംഗളൂരുവിലെ വിധാന സൗധ പൊലീസാണ് കേസ് എടുത്തിരിക്കുന്നത്. ഓള് ഇന്ത്യാ അഡ്വക്കേറ്റ് അസോസിയേഷന് പ്രസിഡന്റ് ഭക്തവചല നല്കിയ രേഖാമൂലമുള്ള പരാതിയിലാണ് നടപടി.
കഴിഞ്ഞ ദിവസമായിരുന്നു കോടതി മുറിക്കുള്ളില് ചീഫ് ജസ്റ്റിസ് ബി ആര് ഗവായിക്ക് നേരെ ഷൂ എറിയാന് ശ്രമമുണ്ടായത്. അഭിഭാഷകന് രാകേഷ് കിഷോറായിരുന്നു ഇതിന് മുതിര്ന്നത്. ജഡ്ജിമാരുടെ ഡയസിനടുത്തെത്തി രാകേഷ് കിഷോര് ഷൂ ഊരി ചീഫ് ജസ്റ്റിസിനെ എറിയാന് ശ്രമിക്കുകയായിരുന്നു. സുരക്ഷാ ഉദ്യോഗസ്ഥര് സമയോചിതമായി ഇടപെട്ട് അഭിഭാഷകനെ പുറത്തേക്ക് കൊണ്ടുപോവുകയായിരുന്നു. ‘സനാതന ധര്മ്മത്തിന് നേരെയുള്ള അപമാനം ഇന്ത്യ വെച്ചുപൊറുപ്പിക്കില്ല’ എന്ന് വിളിച്ചുപറഞ്ഞാണ് രാകേഷ് കിഷോര് ചീഫ് ജസ്റ്റിസ് ബി ആര് ഗവായിക്ക് നേരെ ഷൂ എറിയാന് ശ്രമിച്ചത്. എന്നാല് അഭിഭാഷകനെതിരെ കേസെടുക്കേണ്ട എന്ന നിലപാടാണ് ചീഫ് ജസ്റ്റിസ് സ്വീകരിച്ചത്.
സംഭവത്തില് രാകേഷ് കിഷോറിനെ ബാര് കൗണ്സില് ഓഫ് ഇന്ത്യ സസ്പെന്ഡ് ചെയ്തിരുന്നു. രാകേഷ് കിഷോറിന്റെ പ്രവര്ത്തി കടുത്ത അച്ചടക്ക ലംഘനമാണെന്ന് സസ്പെന്ഷന് ഉത്തരവില് ഒപ്പിട്ട ബിസിഐ ചെയര്മാന് മനാന് കുമാര് മിശ്ര അഭിപ്രായപ്പെട്ടിരുന്നു. സുപ്രീംകോടതി ബാര് അസോസിയേഷനും സുപ്രീംകോടതി അഡ്വക്കേറ്റസ്-ഓണ്-റെക്കോര്ഡ് അസോസിയേഷനും സംഭവത്തെ അപലപിച്ചിരുന്നു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
