HIGHLIGHTS : തിരുവനന്തപുരം: പൗരത്വ ഭേദഗതി നിയമത്തിനെതിരെ നിയമസഭയില് മുഖ്യമന്ത്രി പിണറായി വിജയന് പ്രമേയം അവതരിപ്പിച്ചു. പൗരത്വ നിയമ ഭേദഗതി റദ്ദാക്കി രാജ്യത്തെ ...
തിരുവനന്തപുരം: പൗരത്വ ഭേദഗതി നിയമത്തിനെതിരെ നിയമസഭയില് മുഖ്യമന്ത്രി പിണറായി വിജയന് പ്രമേയം അവതരിപ്പിച്ചു. പൗരത്വ നിയമ ഭേദഗതി റദ്ദാക്കി രാജ്യത്തെ ജനതയെ ഒന്നായി കാണുന്ന ഭരണഘടനാ കാഴ്ചപ്പാട് മുറുകെ പിടിക്കുവാന് കേന്ദ്രസര്ക്കാര് തയ്യാറാകണമെന്ന് മുഖ്യമന്ത്രി പിണറായി വിജയന്. പൗരത്വത്തില് നിന്ന് പുറത്താക്കപ്പെടുന്നവരെ പാര്പ്പിക്കാനുള്ള ഡിറ്റെന്ഷന് സെന്ററുകള് നിര്മ്മിക്കാനുള്ള യാതൊരു നടപടിയും സംസ്ഥാന സര്ക്കാര് സ്വീകരിക്കില്ലെന്നും മുഖ്യമന്ത്രി വ്യക്തമാക്കി.
മതത്തിന്റെ അടിസ്ഥാനത്തില് പൗരത്വം നിര്ണയിക്കുമ്പോള്, മതരാഷ്ട്ര സമീപനമാണ് ഇതില് ഉള്ച്ചേര്ന്നിരിക്കുന്നത്. ഇതു ഭരണഘടന മുന്നോട്ടുവെയ്ക്കുന്ന മതനിരപേക്ഷ കാഴ്ചപ്പാടിനു കടവിരുദ്ധമായതിനാല് ഈ നിയമം ഭരണഘടനയുടെ അടിസ്ഥാന ഘടകങ്ങളില് പ്രധാനപ്പെട്ട ഒന്നായ മതനിരപേക്ഷത സംരക്ഷിക്കപ്പെടുന്നതിനുള്ള കൂട്ടായ പരിശ്രമം എല്ലാ മതവിഭാഗങ്ങളുടെയും മതനിരപേക്ഷ കാഴ്ചപ്പാടുള്ളവരുടെയും ഭാഗത്തുനിന്ന് ഉണ്ടാകേണ്ട സന്ദര്ഭമാണെന്നും മുഖ്യമന്ത്രി പ്രമേയത്തിലൂടെ വ്യക്തമാക്കി. നമ്മുടെ രാജ്യത്തെ വലിയൊരു വിഭാഗം ജനങ്ങള്ക്കിടയില് ഉണ്ടായ ആശങ്കകള് കണക്കിലെടുത്ത് പൗരത്വം നല്കുന്നതില് മതാടിസ്ഥാനത്തിലുള്ള വിവേചനത്തിനു വഴിവെയ്ക്കുന്നതു ഭരണഘടന വിഭാവനം ചെയ്യുന്ന മതനിരപേക്ഷത തകര്ക്കുന്നതുമായ 2019 ലെ പൗരത്വ ഭേദഗതി നിയമം റദ്ദ് ചെയ്യാനുളള നടപടി സ്വീകരിക്കണമെന്ന് കേരള നിയമസഭ കേന്ദ്ര സര്ക്കാറിനോട് അഭ്യര്ത്ഥിക്കുന്നു എന്ന് പ്രമേയത്തിലൂടെ മുഖ്യമന്ത്രി വ്യക്തമാക്കി.
ഇന്ത്യയില് ആദ്യമായാണ് ഒരു സംസ്ഥാനം പൗരത്വ ഭേദഗതി നിയമത്തിനെതിരെ നിയമസഭയില് പ്രമേയം പാസാക്കുന്നത്.