ന്യൂഡല്ഹി: ചോദ്യത്തിന് കോഴ വിവാദത്തില് തൃണമൂല് കോണ്ഗ്രസ് എംപി മഹുവ മൊയ്ത്രയെ ലോക്സഭയില് നിന്ന് പുറത്താക്കി. മഹുവ മൊയ്ത്രയ്ക്കെതിരായ എത്തിക്സ് കമ്മറ്റി റിപ്പോര്ട്ട് ലോക്സഭയില് ചര്ച്ചയ്ക്ക് വച്ച ശേഷമായിരുന്നു പുറത്താക്കല്. ചോദ്യത്തിന് പണം വാങ്ങിയെന്ന ആരോപണത്തിന്റെ അടിസ്ഥാനത്തില് മഹുവയെ പാര്ലമെന്റില് നിന്ന് നീക്കണമെന്നാണ് റിപ്പോര്ട്ട് ശുപാര്ശ ചെയ്യുന്നത്. മഹുവ മൊയ്ത്രയെ പുറത്താക്കുന്നതിനുള്ള വോട്ടെടുപ്പില് പ്രതിപക്ഷം പങ്കെടുത്തില്ല.
മഹുവ മൊയ്ത്രയെ പുറത്താക്കാന് ലോകസഭയ്ക്ക് അധികാരമില്ലെന്ന് കോണ്ഗ്രസ് അടക്കമുള്ള പ്രതിപക്ഷം വാദിച്ചെങ്കിലും സ്പീക്കര് ഓം ബിര്ള അംഗീകരിച്ചില്ല. ഏഴ് മിനിറ്റെങ്കിലും സംസാരിക്കാന് മഹുവയെ അനുവദിക്കണമെന്ന തൃണമൂല് കോണ്ഗ്രസിന്റെ ആവശ്യവും സ്പീക്കര് അംഗീകരിച്ചില്ല. എത്തിക്സ് കമ്മിറ്റിക്ക് മുമ്പാകെ സംസാരിക്കാന് അവര്ക്ക് അവസരം ലഭിച്ചിരുന്നുവെന്നാണ് സ്പീക്കര് വിശദീകരിച്ചത്. പാര്ലമെന്ററികാര്യ മന്ത്രി പ്രഹ്ലാദ് ജോഷി അവതരിപ്പിച്ച പ്രമേയം ശബ്ദ വോട്ടോടെയാണ് പാസാക്കിയത്. വോട്ടെടുപ്പ് ബഹിഷ്കരിച്ച് പ്രതിപക്ഷം സഭ വിട്ടതോടെ ലോക്സഭ തിങ്കളാഴ്ചത്തേക്ക് പിരിഞ്ഞു.
അതേസമയം, അടുത്ത 30 വര്ഷം പാര്ലമെന്റിന് അകത്തും പുറത്തും പോരാട്ടം തുടരുമെന്ന് മഹുവ മൊയ്ത്ര പറഞ്ഞു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
