കാസര്കോട്: കുമ്പള അനന്തപുരം അനന്തപത്മനാഭസ്വാമി ക്ഷേത്രത്തിലെ പ്രശസ്തയായ മുതല ബബിയ മരിച്ചു. ഇന്നലെ രാത്രിയാണ് ക്ഷേത്രത്തിലെത്തിയിരുന്ന ഭക്തര്ക്ക് കൗതുക കാഴ്ചയായിരുന്ന മുതല മരണപ്പെട്ടത്. 75 വയസില് ഏറെ പ്രായമുള്ള ബബിയ പൂര്ണ്ണമായും സസ്യാഹാരിയായിരുന്നു.
നിരുപദ്രവകാരിയായ മുതല അനന്തപുരം അനന്തപത്മനാഭസ്വാമി ക്ഷേത്രത്തിലെ പ്രത്യേകതയായിരുന്നു . ഇടയ്ക്കിടെ തടാകത്തിലെ തന്റെ മാളത്തില് നിന്നും മുതല കരയ്ക്ക് കയറി ശ്രീകോവിലിനടുത്തെത്തും. ഒരിക്കല് ബബിയ ശ്രീകോവിലിനു മുന്നില് ‘ദര്ശനം’ നടത്തിയത് ക്ഷേത്ര പൂജാരി മൊബൈലില് പകര്ത്തി. ഈ ചിത്രങ്ങള്ക്ക് സമൂഹമാധ്യമങ്ങളിലടക്കം വലിയ പ്രചാരണം ലഭിച്ചിരുന്നു.
സസ്യാഹാരിയായ ബബിയക്ക് ക്ഷേത്രത്തില് രാവിലെയും ഉച്ചയ്ക്കുമുള്ള പൂജകള്ക്കുശേഷം നല്കുന്ന നിവേദ്യമായിരുന്നു ഭക്ഷണം. ഇതുവരെ വന്യമായ പെരുമാറ്റം മുതലയില് നിന്ന് ഉണ്ടായിട്ടില്ലെന്നാണ് പ്രദേശവാസികള് പറയുന്നത്. കുളത്തിലെ മറ്റ് ജീവജാലങ്ങളെയും മല്സ്യങ്ങളെയും ബബിയ ഉപദ്രവിക്കാറില്ലെന്നും ഇവര് പറയുന്നു.
