തിരുവനന്തപുരം: വടക്കാഞ്ചേരിയില് രണ്ടു യുവാക്കളുടെ മരണത്തിനിടയാക്കിയ അപകടത്തില് കെഎസ്ആര്ടിസി ഡ്രൈവറെ സസ്പെന്ഡ് ചെയ്തു. വടക്കാഞ്ചേരി ഓപ്പറേറ്റിങ് സെന്ററിലെ ഡ്രൈവറായ സിഎസ് ഔസേപ്പിനെയാണ് അന്വേഷണ വിധേയമായി കെഎസ്ആര്ടിസി സിഎംഡി സസ്പെന്ഡ് ചെയ്തത്.
ഫെബ്രുവരി ഏഴിനായിരുന്നു പാലക്കാടുനിന്നും വടക്കാഞ്ചേരിയിലേ
ക്ക് സര്വീസ് നടത്തിയ കെഎസ്ആര്ടിസി ബസ് അപകടത്തില്പ്പെട്ട് ബൈക്ക് യാത്രക്കാരായ യുവാക്കള് മരിച്ചത്.
സംഭവവുമായി ബന്ധപ്പെട്ട് ഡ്രൈവര്ക്ക് ഗുരുതര വീഴ്ച സംഭവിച്ചതായി നേരത്തെ ആക്ഷേപം ഉയര്ന്നിരുന്നു. ഡ്രൈവറുടെ അശ്രദ്ധയാണ് അപകടത്തിന് കാരണമെന്ന വിലയിരുത്തലിന്റെ അടിസ്ഥാനത്തില്കൂടിയാണ് സസ്പെന്ഷന്.
റോഡിന്റെ വലതുവശത്തുകൂടെ പോവുകയായിരുന്ന ലോറിയെ മറികടക്കുകയായിരുന്നു ബൈക്ക്. ഇതിനിടെ കെ.എസ്.ആര്.ടി.സി. ബസും ലോറിയെ മറികടക്കാന് ശ്രമിച്ചു. ബസ് വരുന്നത് കണ്ട് ബൈക്ക് വലത്തേക്ക് മാറിയെങ്കിലും കെ.എസ്.ആര്.ടി.സി. ഡ്രൈവര് വീണ്ടും വലത്തോട്ട് വെട്ടിക്കുകയായിരുന്നു. ഇതോടെ ബൈക്ക് ബസിനും ലോറിക്കും ഇടയില് വീണു. ബൈക്കിന് മുകളിലൂടെ ബസ് കയറിയിറങ്ങുകയും ചെയ്തു.
അപകടത്തില്പ്പെട്ട വാഹനങ്ങളുടെ പിന്നിലുണ്ടായിരുന്ന ഒരു കാറിലെ ഡാഷ്കാമിലാണ് അപകട ദൃശ്യങ്ങള് പതിഞ്ഞിരുന്നത്. പാലക്കാട് കാവിശ്ശേരി സ്വദേശി ആദര്ശ് മോഹന്, കാസര്കോട് സ്വദേശി സാബിത്ത് എന്നിവരാണ് അപകടത്തില് മരിച്ചത്.
