തിരുവനന്തപുരം: സജി ചെറിയാന്റെ വിവാദ പ്രസംഗത്തിനെതിരായ പരാതിയില് പൊലീസ് കേസെടുത്തു. മല്ലപ്പള്ളിയില് പാര്ട്ടി പരിപാടിയില് വെച്ചാണ് ഭരണഘടനയെ അവഹേളിക്കുന്ന തരത്തില് മന്ത്രിയായിരിക്കെ സജി ചെറിയാന് പ്രസംഗിച്ചത്. പ്രസംഗത്തിന്റെ വീഡിയോ ദൃശ്യം പരിശോധിച്ച ശേഷമായിരുന്നു കീഴ്വായ്പൂര് പൊലീസിന്റെ നടപടി. വാക്ക് കൊണ്ടോ പ്രവര്ത്തി കൊണ്ടോ ഭരണഘടനയെ അവഹേളിക്കുന്നതിനെതിരായ വകുപ്പാണിത്.
മന്ത്രി ഭരണഘടനയെ അവഹേളിച്ചെന്ന പരാതിയില് കേസെടുക്കണമെന്ന് തിരുവല്ല ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി പൊലീസിന് നിര്ദേശം നല്കിയിരുന്നു.
കോടതി നിര്ദേശിച്ചാല് 24 മണിക്കൂറിനുള്ളില് കേസടുക്കണം. ഇതിനാലാണ് പൊലീസ് ഇന്ന് തന്നെ നടപടിയിലേക്ക് കടന്നത്. പ്രിവന്ഷന് ഓഫ് ഇന്സള്ട്ട് ടു നാഷണല് ഓണര് ആക്ടിലെ രണ്ടാം വകുപ്പ് പ്രകാരമാണ് കേസെടുത്തത്.
.
പ്രസംഗത്തിന്റെ പൂര്ണരൂപം ലഭിച്ചാല് മാത്രമേ നിയമോപദേശം നല്കാന് കഴിയൂവെന്നു ജില്ലാ പബ്ലിക് പ്രോസിക്യൂട്ടര് എ.സി.ഈപ്പന് പൊലീസിനെ അറിയിച്ചു.
