തിരുവനന്തപുരം: സംസ്ഥാനത്ത് ഇന്നും വ്യാപക മഴയ്ക്ക് സാധ്യത. കിഴക്കന് മേഖലകളിലാണ് കൂടുതല് മഴ സാധ്യത. ഒറ്റപ്പെട്ട ഇടങ്ങളില് ശക്തമായ മഴ ലഭിച്ചേക്കും. 10 ജില്ലകളില് കേന്ദ്ര കാലാവസ്ഥ വകുപ്പ് യെല്ലോ അലേര്ട്ട് പ്രഖ്യാപിച്ചു. തിരുവനന്തപുരം മുതല് മലപ്പുറം വരെയുള്ള ജില്ലകളിലാണ് യെല്ലോ അലര്ട്ട്. തിരുവന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്, പാലക്കാട്, മലപ്പുറം ജില്ലകളിലാണ് മഞ്ഞ അലര്ട്ട് പ്രഖ്യാപിച്ചത്. ഇടിയോടുകൂടിയ മഴയ്ക്കും സാധ്യതയുണ്ട്.
തെക്ക് കിഴക്കന് അറബികടലില് കേരള തീരത്തിനു സമീപമായി ചക്രവാതചുഴി നിലനില്ക്കുന്നുണ്ട്. നാളെയോടെ വടക്കന് ആന്ഡമാന് കടലിന് മുകളില് ചക്രവാതചുഴി രൂപപ്പെടും. ഇത് വ്യാഴാഴ്ചയോടെ ബംഗാള് ഉള്കടലില് എത്തിചേര്ന്നു ന്യൂനമര്ദ്ദമായി ശക്തി പ്രാപിക്കാന് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തല്.
അതിനാല് അടുത്ത ദിവസങ്ങളിലും മഴ തുടരാനാണ് സാധ്യത. തുലാവര്ഷത്തിനു മുന്നോടിയായി ഉള്ള മഴയും ഈ ദിവസങ്ങളില് കിട്ടും.
