തിരുവനന്തപുരം: പീരുമേട് എംഎല്എ വാഴൂര് സോമന് (72) അന്തരിച്ചു. ഹൃദയാഘാതത്തെത്തുടര്ന്നായിരുന്നു അന്ത്യം. ഔദ്യോഗിക പരിപാടിക്കിടെ കുഴഞ്ഞുവീഴുകയായിരുന്നു. തിരുവനന്തപുരത്തെ സ്വകാര്യ ആശുപത്രിയില് വെച്ചാണ് മരണം സംഭവിച്ചത്. തോട്ടം തൊഴിലാളികളെ സംഘടിപ്പിച്ചു വളര്ന്ന നേതാവായിരുന്നു വാഴൂര് സോമന്.
പി.ടി.പി. നഗറില് റവന്യൂ വകുപ്പിന്റെ ഇടുക്കി ജില്ലാതല യോഗത്തില് പങ്കെടുത്ത ശേഷം മടങ്ങുന്ന വഴിയാണ് വാഴൂര് സോമന് എംഎല്എയ്ക്ക് ഹൃദയാഘാതമുണ്ടായത്. തുടര്ന്ന്, റവന്യൂ മന്ത്രിയുടെ വാഹനത്തില് അദ്ദേഹത്തെ ഉടന് തന്നെ ശാസ്തമംഗലത്തെ ആശുപത്രിയില് എത്തിക്കുകയായിരുന്നു. ചികിത്സയിലിരിക്കെ ആയിരുന്നു അന്ത്യം. സംസ്കാരം നാളെ വൈകിട്ട് നാലിന് വീട്ടുവളപ്പില് വെച്ച് നടക്കും. മൃതദേഹം രാത്രി എട്ട് മണി വരെ എം എന് സ്മാരകം പൊതുദര്ശനത്തിന് വെച്ച ശേഷം ഇടുക്കിയിലേക്ക് കൊണ്ടുപോകും.
ഇടുക്കി പീരുമേട്ടില് നിന്ന് സിപിഐ എംഎല്എ ആയാണ് വാഴൂര് സോമന് നിയമസഭയിലെത്തിയത്. 1835 വോട്ടിന്റെ ഭൂരിപക്ഷത്തിലായിരുന്നു വിജയം. യുഡിഎഫ് സ്ഥാനാര്ഥി അഡ്വ. സിറിയക് തോമസ് ആയിരുന്നു വാഴൂര് സോമന്റെ എതിരാളി. വെയര് ഹൗസിങ് കോര്പ്പറേഷന് ചെയര്മാന്, എഐടിയുസി സംസ്ഥാന വൈസ് പ്രവസിഡന്റ് എന്നീ പദവികള് വഹിച്ചിട്ടുണ്ട്. ഭാര്യ: ബിന്ദു. മക്കള്: അഡ്വ. സോബിന്, അഡ്വ. സോബിത്ത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
