ഖത്തര് ലോകകപ്പിലെ ഗ്രൂപ്പ് ഡിയില് അവസാന റൗണ്ട് പോരാട്ടങ്ങളില് വമ്പന് അട്ടിമറി. ലോകചാമ്പ്യന്മാരായ ഫ്രാന്സിനെ ടുണീഷ്യ ഒരു ഗോളിന് മലര്ത്തിയടിച്ചപ്പോള് ഡെന്മാര്ക്കിനെ ഒരു ഗോളിന് വീഴ്ത്തി ഓസ്ട്രേലിയ പ്രീ ക്വാര്ട്ടറിലെത്തി. അവസാന നിമിഷം വരെ ഒരു ഗോളിന് പിന്നിലായിരുന്ന ഫ്രാന്സ് ഇഞ്ചുറി ടൈമിന്റെ അവസാന സെക്കന്ഡില് അന്റോണിയോ ഗ്രീസ്മാന് നേടിയ ഗോളില് സമനില നേടിയതിന്റെ ആശ്വാസത്തിലായെങ്കിലും വാര് പരിശോധനയില് ഗ്രീസ്മാന് നേടിയ ഗോള് ഓഫ് സൈഡാണെന്ന് വ്യക്തമായതോടെ ഗോള് നിഷേധിച്ചു. ഇതോടെയാണ് ടുണീഷ്യയുടെ അട്ടിമറിവിജയം സാധ്യമായത്.
തോറ്റെങ്കിലും ഗോള് ശരാശരിയില് ഗ്രൂപ്പ് ചാമ്പ്യന്മാരായി ഫ്രാന്സും രണ്ടാം സ്ഥാനക്കാരായി ഓസ്ട്രേലിയയും ഗ്രൂപ്പ് ഡിയില് നിന്ന് പ്രീ ക്വാര്ട്ടറിലെത്തി. മൂന്ന് കളികളില് നാലു പോയന്റുമായി ടുണീഷ്യയും മൂന്ന് കളികളില് ഒരു പോയന്റ് മാത്രം നേടിയ ഡെന്മാര്ക്കും പ്രീ ക്വാര്ട്ടറിലെത്താെതെ പുറത്തായി. ലോകകപ്പില് ഇതാദ്യമായാണ് ടുണീഷ്യ ഒരു യൂറോപ്യന് രാജ്യത്തെ തോല്പ്പിക്കുന്നത്.
ഗ്രൂപ്പ് സിയില് പോളണ്ടിനെ എതിരില്ലാത്ത രണ്ട് ഗോളിന് തകര്ത്ത് അര്ജന്റീന ഗ്രൂപ്പ് ചാമ്പ്യന്മാരായി പ്രീ ക്വാര്ട്ടറില് പ്രവേശിച്ചു. ആദ്യപകുതിയില് അര്ജന്റീനയെ പിടിച്ചുകെട്ടിയ പോളിഷ് പട രണ്ടാംപകുതിയില് ഇരട്ട ഗോള് വഴങ്ങുകയായിരുന്നു. മാക് അലിസ്റ്ററും, ജൂലിയന് ആല്വാരസുമാണ് അര്ജന്റീനയ്ക്കായി ഗോള് നേടിയത്.
അര്ജന്റീനയുടെ ആക്രമണത്തോടെയാണ് മത്സരം തുടങ്ങിയത്. എന്നാല് ഉയരക്കാരായ പോളിഷ് പ്രതിരോധം വിലങ്ങുതടിയായി. പിന്നാലെയും അര്ജന്റീനന് താരങ്ങള് ആക്രമണങ്ങള് നടത്തിയെങ്കിലും പോളിഷ് ഗോളിയെ മറികടക്കാന് കഴിയാതെപോയി. രണ്ടാംപകുതി അര്ജന്റീന ആക്രമണത്തിലും ഫിനിഷിംഗിലും പിടിച്ചെടുത്തു.
സൗദിയോട് പൊരുതിക്കളിച്ച് മെക്സിക്കോ 2-1ന് വിജയിച്ചെങ്കിലും ഗോള് വ്യത്യാസത്തില് പോയിന്റ് നിലയില് രണ്ടാമതെത്തിയ പോളണ്ടും പ്രീ ക്വാര്ട്ടറിലെത്തി.
