തിരുവനന്തപുരം: സര്ക്കാരിനെ സമ്മര്ദത്തിലാക്കുന്ന സമരവുമായി മുന്നോട്ട് പോകരുതെന്ന് ഗതാഗതമന്ത്രി ആന്റണി രാജു. സ്വകാര്യ ബസ് ഉടമകള് ഇന്ന് അര്ധരാത്രി മുതല് പ്രഖ്യാപിച്ചിരിക്കുന്ന അനിശ്ചിതകാല സമരത്തില് നിന്ന് പിന്മാറണമെന്ന അഭ്യര്ത്ഥനയുമായി ഗതാഗതമന്ത്രി. ബസ് പണിമുടക്കുമായി മുന്നോട്ട് പോയാല് കെ എസ് ആര് ടി സി കൂടുതല് സര്വീസ് നടത്തും.
ചാര്ജ് വര്ധന സര്ക്കാര് അംഗീകരിച്ചതാണ്. അത് എപ്പോള് എങ്ങനെ വേണം എന്നതില് ചര്ച്ച നടക്കുകയാണ്.
ബസ് ചാര്ജ് വര്ധന വൈകുന്നതില് പ്രതിഷേധിച്ച് ബസുടമ സംയുക്ത സമര സമിതിയുടെ നേതൃത്വത്തില് സംസ്ഥാന വ്യാപകമായി നാളെ മുതല് അനിശ്ചിതകാല ബസ് സമരം തുടങ്ങാന് തീരുമാനിച്ചിരിക്കുകയാണ്. മിനിമം ചാര്ജ് 12രൂപയാക്കണം, കിലോമീറ്റര് നിരക്ക് ഒരുരൂപ പത്ത് പൈസ ഉയര്ത്തണം, വിദ്യാര്ഥികളുടെ നിരക്ക് ആറ് രൂപയാക്കണം ഇതെല്ലാമാണ് ബസുടമകളുടെ പ്രധാന ആവശ്യങ്ങള്.
കൊവിഡ് കാലത്തെ വാഹന നികുതി ഒഴിവാക്കണമെന്ന വിദഗ്ധ സമിതി ശുപാര്ശയുണ്ടായിട്ടും നടപ്പാകാത്തതിലും സ്വകാര്യ ബസുടമകള് പ്രതിഷേധം അറിയിച്ചിട്ടുണ്ട്. നവംബര് മാസം തന്നെ മിനിമം ചാര്ജ് 10 രൂപായാക്കാന് ഗതാഗത വകുപ്പ് ആലോചിച്ചെങ്കിലും പ്രഖ്യാപനം ഉണ്ടായില്ല. രാമചന്ദ്രന് നായര് ശുപാര്ശ പരിഗണിച്ചുള്ള മാറ്റം ഉണ്ടാകുമെന്ന സൂചന നല്കുമ്പോഴും എപ്പോള് മുതല് എന്നതില് തീരുമാനം വൈകുന്നു.
