തിരുവനന്തപുരം: റിസര്വ് ബാങ്ക് പ്രഖ്യാപിച്ച ലോണ് തിരിച്ചടവിന്റെ മൊറട്ടോറിയം കാലാവധി കോവിഡ് കാലയളവിലെ സാമ്പത്തിക പ്രതിസന്ധി മുന്നിര്ത്തി നീട്ടി നല്കണമെന്നാവശ്യപ്പെട്ട് കേന്ദ്ര ധനമന്ത്രി നിര്മലാ സീതാരാമന് കത്തയച്ചതായി മുഖ്യമന്ത്രി പിണറായി വിജയന് പറഞ്ഞു.
റിസര്വ് ബാങ്ക് പ്രഖ്യാപിച്ച ലോണ് തിരിച്ചടവിന്റെ മൊറട്ടോറിയം കാലാവധി ഓഗസ്റ്റ് 31 നു അവസാനിക്കും. സൂക്ഷ്മചെറുകിട ഇടത്തരം വ്യവസായ സംരംഭങ്ങളും (എം എസ് എം ഇ) ചെറുകിട വ്യാപാരികളും കടുത്ത പണ ഞെരുക്കം അനുഭവിക്കുന്ന സമയത്ത് മൊറട്ടോറിയം തുടരേണ്ടത് അനിവാര്യമാണ്.
മൊറട്ടോറിയം കാലയളവില് വന്നു ചേര്ന്ന ഭീമമായ പലിശയും ഇത്തരക്കാര്ക്ക് വലിയ വെല്ലുവിളിയായി മാറിയിട്ടുണ്ട്. ഈ സാഹചര്യത്തില് മൊറട്ടോറിയം പരിധി 2020 ഡിസംബര് 31 വരെ നീട്ടി നല്കാന് റിസര്വ് ബാങ്കിനോട് ആവശ്യപ്പെടണമെന്നും, പലിശയുടെ കാര്യത്തില് ഇളവുകള് നല്കികൊണ്ടുള്ള പദ്ധതികള് ആവിഷ്ക്കരിക്കാനും മന്ത്രിയോട് കത്തിലൂടെ അഭ്യര്ത്ഥിച്ചു.
