തിരുവനന്തപുരം: സൗദി ജയിലില് വധശിക്ഷയ്ക്ക് വിധേയനായി കഴിയുകയായിരുന്ന അബ്ദു റഹീമിനെ മോചിപ്പിക്കാന് 34 കോടി സമാഹരിച്ച കേരളത്തിന്റെ നല്ല മനസ്സിനെ പ്രകീര്ത്തിച്ച് മുഖ്യമന്ത്രി പിണറായി വിജയന്. ഫേസ്ബുക്ക് പോസ്റ്റിലൂടെയായിരുന്നു കേരളത്തിലെ മുഴുവന് ആളുകള്ക്കും മുഖ്യമന്ത്രി നന്ദി പറഞ്ഞത്.
മുഖ്യമന്ത്രിയുടെ ഫേസ്ബുക്ക് പോസ്റ്റ് :-
വെറുപ്പിന്റെ പ്രചാരകര് നാടിനെതിരെ നുണക്കഥകള് ചമയ്ക്കുമ്പോള് മാനവികതയുടേയും മനുഷ്യസ്നേഹത്തിന്റേയും ഗാഥകളിലൂടെ പ്രതിരോധം ഉയര്ത്തുകയാണ് മലയാളികള്. സൗദി അറേബ്യയില് വധശിക്ഷയ്ക്ക് വിധിക്കപ്പെട്ട കോഴിക്കോട് സ്വദേശി അബ്ദുല് റഹീമിന്റെ മോചനത്തിനായി ലോകമാകെയുള്ള മലയാളികള് കൈകോര്ത്ത് സമാഹരിച്ചത് 34 കോടി രൂപയാണ്. ഒരു മനുഷ്യജീവന് കാക്കാന്, ഒരു കുടുംബത്തിന്റെ കണ്ണീരൊപ്പാന് ഒറ്റക്കെട്ടായി അവര് സൃഷ്ടിച്ചത് മനുഷ്യസ്നേഹത്തിന്റെ ഉദാത്ത മാതൃകയാണ്. ഇതാണ് യഥാര്ത്ഥ കേരള സ്റ്റോറി.
വര്ഗീയതയ്ക്ക് തകര്ക്കാനാകാത്ത സാഹോദര്യത്തിന്റെ കോട്ടയാണ് കേരളമെന്ന അടിയുറച്ച പ്രഖ്യാപനമാണിത്. ലോകത്തിനു മുന്നില് കേരളത്തിന്റെ അഭിമാനമുയര്ത്തിയ ഈ ലക്ഷ്യത്തിനായി ഒത്തൊരുമിച്ച എല്ലാ സുമനസ്സുകളേയും ഹാര്ദ്ദമായി അഭിനന്ദിക്കുന്നു. പ്രവാസി മലയാളികള് ഈ ഉദ്യമത്തിനു പിന്നില് വഹിച്ച പങ്ക് പ്രശംസനീയമാണ്. ഈ ഐക്യത്തിന് കൂടുതല് കരുത്തേകി ഒരു മനസ്സോടെ നമുക്കു മുന്നോട്ടു പോകാം.
ഇന്നലെ വൈകുന്നേരത്തോടെയാണ് അബ്ദു റഹീമിന്റെ മോചനത്തിനായുള്ള ദയാധന സമാഹരണം പൂര്ത്തിയായത്. തുടര്ന്ന് ഇനി പണം അക്കൗണ്ടിലേക്ക് നിക്ഷേപിക്കരുതെന്ന് സഹായസമിതി അറിയിക്കുകയായിരുന്നു. അബ്ദു റഹീമിന്റെ മോചനത്തിനായി ആരംഭിച്ച ട്രസ്റ്റ് വഴിയാണ് പണസമാഹരണം നടത്തിയത്. ഈ പണം ഇന്ത്യന് എംബസി മുഖേന സൗദി കുടുംബത്തിന് കൈമാറും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
