തിരുവനന്തപുരം: വിമാനത്തില് വച്ച് മുഖ്യമന്ത്രി പിണറായി വിജയനെ വധിക്കാന് ശ്രമിച്ചെന്ന കേസില് അറസ്റ്റിലായ മുന് എംഎല്എ ശബരീനാഥനെ തിരുവനന്തപുരം ജനറല് ആശുപത്രിയില് വൈദ്യ പരിശോധനയ്ക്ക് വിധേയനാക്കിയ ശേഷം വഞ്ചിയൂര് കോടതിയില് ഹാജരാക്കി. കെ.എസ്.ശബരീനാഥിനായി കോടതിയില് മുന്കൂര് ജാമ്യാപേക്ഷ സമര്പ്പിച്ചു. തിരുവനന്തപുരം ജില്ലാ സെഷന്സ് കോടതിയിലാണ് ശബരിനാഥിന്റെ അഭിഭാഷകന് മുന്കൂര് ജാമ്യാപേക്ഷ സമര്പ്പിച്ചത്. നേരത്തെ ശബരീനാഥനായി ജില്ലാ സെഷന്സ് കോടതിയില് മുന്കൂര് ജാമ്യാപേക്ഷ സമര്പ്പിച്ചതും ഇതേ അഭിഭാഷകന് ആയിരുന്നു. മുന്കൂര് ജാമ്യാപേക്ഷ പരിഗണിക്കുന്നതിനിടെയാണ് കെ.എസ്.ശബരീനാഥനെ അറസ്റ്റ് ചെയ്തെന്ന വിവരം അന്വേഷണം സംഘം കോടതിയെ അറിയിച്ചത്.
അറസ്റ്റ് രേഖപ്പെടുത്തിയ സമയവും രേഖകളും ഹാജരാക്കാന് കോടതി അന്വേഷണ സംഘത്തോട് നിര്ദ്ദേശിച്ചു. ഹര്ജി പരിഗണിക്കും വരെ ശബരിനാഥനെ അറസ്റ്റ് ചെയ്യരുതെന്ന് കോടതി വാക്കാല് നിര്ദേശം നല്കിയിരുന്നു. എന്നാല്, 10.50 നാണ് അറസ്റ്റ് രേഖപ്പെടുത്തിയതെന്ന് സര്ക്കാര് അഭിഭാഷകന് കോടതിയെ അറിയിച്ചു. 11 മണിക്കാണ് സെഷന്സ് കോടതി ശബരിനാഥന്റെ മുന്കൂര് ഹര്ജി പരിഗണിച്ചത്.
വിമാനത്തിലെ പ്രതിഷേധത്തില് കേസെടുത്തത് സര്ക്കാരിന്റെ ഭീരുത്വമാണെന്നാണ് ചോദ്യം ചെയ്യലിന് ഹാജരാകും മുമ്പ് ശബരിനാഥ് മാധ്യമങ്ങളോട് പ്രതികരിച്ചിരുന്നു. ഒരു ജനാധിപത്യ സംവിധാനത്തില് പ്രതിഷേധിക്കാന് എല്ലാവര്ക്കും അവകാശമുണ്ടെന്നും സമാധാനപരമായിട്ടാണ് യൂത്ത് കോണ്ഗ്രസ് പ്രവര്ത്തകര് വിമാനത്തില് പ്രതിഷേധിച്ചതെന്നും ശബരിനാഥ് പറഞ്ഞു.
അതേസമയം, മുഖ്യമന്ത്രിക്കെതിരായ വധശ്രമ കേസില് ശബരിനാഥനെ അറസ്റ്റ് ചെയ്തത് ഉന്നതതല ഗൂഢാലോചനയുടെ ഭാഗമാണെന്ന് പ്രതിപക്ഷനേതാവ് വി.ഡി.സതീശന് ആരോപിച്ചു. സര്ക്കാര് വൈര്യ നിര്യാതന ബുദ്ധിയോടെ പ്രവര്ത്തിക്കുകയാണ്. അധികാരവും പൊലീസും കൈയ്യില് ഉള്ളതിനാല് എന്തും ചെയ്യുന്ന അവസ്ഥയാണ്. ഇ.പി.ജയരാജനെതിരെ കേസില്ല എന്നത് സംഭവത്തില് ഇരട്ട നീതിയാണെന്ന് വെളിവാക്കുന്നതായും സതീശന് പറഞ്ഞു.
