തിരുവനന്തപുരത്ത് സ്കൂള് വിദ്യാര്ത്ഥികളുടെ ലഹരി ഉപയോഗത്തിനെതിരെ പരാതിപ്പെട്ടതിന് യുവാവിനെതിരെ വിദ്യാര്ത്ഥികളുടെ ക്രൂര മര്ദ്ദനം. വര്ക്കല സ്വദേശി അനുവിനെയാണ് കഴിഞ്ഞ ആഴ്ച ചാവടിമുക്ക് ജംഗ്ഷനില് വച്ച് മര്ദ്ദിച്ചത്.
മര്ദ്ദനമേറ്റ് വീണ അനുവിനെ നാട്ടുകാര് ചേര്ന്നാണ് വര്ക്കല താലൂക്ക് ആശുപത്രിയില് എത്തിച്ചത്. തുടര്ന്ന് തിരുവനന്തപുരം സ്വകാര്യ ആശുപത്രിയിലേക്ക് മാറ്റി.
അനുവിന്റെ വീടിന്റെ പരിസരത്തുള്ള സ്കൂളിലെ ചില പ്ലസ് ടു വിദ്യാര്ത്ഥികള് ലഹരി ഉപയോഗവും ബൈക്ക് റൈസും നടത്തിയിരുന്നു. ഇതിനെ പ്രദേശവാസികള് പല തവണ ചോദ്യം ചെയ്യുകയും നിര്ത്താതായതോടെ സ്കൂളില് പരാതി കൊടുക്കുകയും ചെയ്തു. എന്നിട്ടും പ്രശ്ന പരിഹാരം ഇല്ലാതായതോടെ അനുവിന്റെ നേതൃത്വത്തില് പ്രദേശത്തെ 40 പേര് ഒപ്പിട്ട പരാതി പൊലീസിന് കൈമാറി. ഇതില് പ്രകോപിതരായ ഒരു സംഘം വിദ്യാര്ത്ഥികള് അനുവിന്റെ വീട്ടിന് മുന്നിലെത്തി ഭീഷണി മുഴക്കുകയും ചെയ്തിരുന്നു. ഈ സംഭവത്തിലും വര്ക്കല ഡിവൈഎസ്പിക്ക് പരാതി നല്കിയതായി അനു പറയുന്നു. ഇതേത്തുടര്ന്ന് മാര്ച്ച് 31 ന് രാത്രി 10.30 ന് അനുവിനെ ക്രൂരമായി മര്ദിക്കുകയായിരുന്നു.
ആയിരൂര് സിഐയുടെ നേതൃത്വത്തിലുള്ള സംഘം അന്വേഷണം ആരംഭിച്ചു.
