കോഴിക്കോട് : വിവിധ ആവശ്യങ്ങള്ക്കായി കോഴിക്കോട് നഗരത്തിലെത്തുന്ന വനിതകള്ക്ക് മിതമായ നിരക്കില് സുരക്ഷിത താമസ സൗകര്യം ഒരുക്കുകയെന്ന ലക്ഷ്യത്തോടെ കോര്പ്പറേഷന് നിര്മ്മിച്ച ഷീ ലോഡ്ജിന്റെ പ്രവേശനോത്സവം നടത്തുന്നു. റെയില്വേ സ്റ്റേഷന് ലിങ്ക് റോഡിലുള്ള ഷീ ലോഡ്ജ് കെട്ടിടത്തില് ഡോര്മെറ്ററി മുതല് എസി ഡീലക്സ് ഡബിള് ബെഡ് വരെയുള്ള സൗകര്യങ്ങള് ഒരു ദിവസത്തിന് 100 രൂപ മുതല് 2250 രൂപ വരെയുള്ള വിവിധ നിരക്കുകളിലാണ് ഒരുക്കിയത്.
സ്ത്രീകള്ക്ക് സാമ്പത്തികനിലയനുസരിച്ച് അനുയോജ്യമായ സൗകര്യങ്ങള് ഉപയോഗപ്പെടുത്താം. താമസത്തിനെത്തുന്നവര്ക്ക് മിതമായ നിരക്ക് ഈടാക്കി ഭക്ഷണം ലഭ്യമാക്കുന്നതിനുള്ള സംവിധാനവും സജ്ജീകരിച്ചിട്ടുണ്ട്.
നഗരത്തിലെ ജോലിക്കാരായ വനിതകള്ക്ക് മിതമായ നിരക്കില് സുരക്ഷിതവും സൗകര്യപ്രദവുമായ താമസത്തിനായി നിര്മ്മിച്ച മാങ്കാവിലെ ഹൈമവതി തായാട്ട് സ്മാരക വര്ക്കിംഗ് വിമന്സ് ഹോസ്റ്റലിന്റെയും പ്രവേശനോത്സവം നടത്തും. ഹോസ്റ്റലില് രണ്ടു പേര്ക്ക് വീതം താമസിക്കാന് കഴിയുന്ന ബെഡ്റൂമുകളും നാല് പേര്ക്ക് താമസിക്കാന് കഴിയുന്ന ബെഡ്റൂമുകളുമാണ് സജ്ജീകരിച്ചത്. താമസത്തോടൊപ്പം ഭക്ഷണവും ഹോസ്റ്റലില് ലഭ്യമാക്കും.
കുടുംബശ്രീ യൂണിറ്റുകളില് നിന്നും സീല്ഡ് ക്വട്ടേഷന് ക്ഷണിച്ചു കൊണ്ട് തെരഞ്ഞെടുത്തിട്ടുള്ള ഷീ വേള്ഡ്, സാഫല്യം അയല്ക്കൂട്ടം എന്നിവര്ക്കാണ് യഥാക്രമം ഷീ ലോഡ്ജിന്റെയും വനിതാ ഹോസ്റ്റലിന്റെയും നടത്തിപ്പ് ചുമതല നല്കിയത്.
മാര്ച്ച് 11ന് രാവിലെ 9.30 ന് ഷീ ലോഡ്ജിന്റെയും തുടര്ന്ന് 10.30 ന് മാങ്കാവിലെ ഹൈമവതി തായാട്ട് സ്മാരക വര്ക്കിംഗ് വിമന്സ് ഹോസ്റ്റലിന്റെയും പ്രവേശനോത്സവ ഉദ്ഘാടനം വിനോദസഞ്ചാര, പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് നിര്വഹിക്കും. മേയര് ബീന ഫിലിപ്പ് അധ്യക്ഷത വഹിക്കുന്ന ചടങ്ങില് ഡെപ്യൂട്ടി മേയര് സി പി മുസാഫര് അഹമ്മദ്, സ്ഥിരം സമിതി ചെയര്മാന്മാര്, കൗണ്സിലര്മാര് മറ്റു വിശിഷ്ടാതിഥികള് തുടങ്ങിയവര് പങ്കെടുക്കും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
