തിരുവനന്തപുരം: വേനലവധിക്ക് ശേഷം സംസ്ഥാനത്തെ സ്കൂളുകള് ഇന്ന് തുറക്കുമ്പോള് വിദ്യാര്ത്ഥികള്ക്ക് ആശംസകളുമായി കേരള പൊലീസ്. ഒപ്പം ശ്രദ്ധിക്കേണ്ട കാര്യങ്ങളെ കുറിച്ചും പൊലീസ് ഓര്മ്മിപ്പിക്കുന്നുണ്ട്. ചുറ്റിലേക്കും തലയുയര്ത്തി നോക്കുക. എന്ത് ആവശ്യത്തിനും ഞങ്ങള് കൂടെയുണ്ടെന്നാണ് പൊലീസ് പറയുന്നത്. എപ്പോള് വേണമെങ്കിലും 112 എന്ന നമ്പറില് വിളിയ്ക്കാം. അപരിചിതരുമായി ചങ്ങാത്തതിലാക്കുകയോ, അവര് നല്കുന്ന ഭക്ഷണം വാങ്ങി കഴിക്കുകയാ ചെയ്യരുത്. റോഡിലൂടെ നടക്കുമ്പോള് വലതുവശം ചേര്ന്ന് നടക്കുക. സീബ്ര ലൈനില് മാത്രം റോഡ് മുറിച്ച് കടക്കുക. മൊബൈല് ഫോണുകള് ആവശ്യത്തിന് മാത്രം ഉപയോഗിക്കുക. പത്ര വായന ശീലമാക്കുക സോഷ്യല് മീഡിയയ്ക്ക് അടിമപ്പെടാതിരിക്കുക… സ്വപ്നങ്ങളും പ്രതീക്ഷകളുമായി പുതിയൊരു അധ്യയന വര്ഷത്തിലേക്ക് മക്കള് പ്രവേശിക്കുകയാണ്. കളിയും ചിരിയും കൊച്ചു കൊച്ചു പിണക്കവും മധുരമായ ഇണക്കവും ഇഴചേരുന്ന സ്കൂള് കാലം. മഴ നനഞ്ഞൊട്ടിയും, വെള്ളം തട്ടിത്തെറിപ്പിച്ചും, കിളികളോടും, തൊടികളോടും വര്ത്തമാനം പറഞ്ഞും നടന്നൊരു ബാല്യം ഓര്മയിലോടിയെത്തുന്നു എന്നിങ്ങനെ പോകുന്നു പൊലീസിന്റെ ഓര്മ്മപ്പെടുത്തലുകള്.
അതേസമയം, സംസ്ഥാനതല പ്രവേശനോത്സവം കൊച്ചി എളമക്കര സര്ക്കാര് ഹയര് സെക്കന്ഡറി സ്കൂളില് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. വിദ്യാഭ്യാസ മന്ത്രി വി ശിവന്കുട്ടി അധ്യക്ഷത വഹിക്കും. രാവിലെ 9 മണി മുതല് ഒന്നാം ക്ലാസിലെത്തുന്ന കുട്ടികളെ വിദ്യാഭ്യാസ മന്ത്രിയുടെ നേതൃത്വത്തില് സ്വീകരിക്കും. 9.30ന് പ്രവേശനോത്സവ ഗാനത്തിന്റെ ദൃശ്യാവിഷ്കാരം അവതരിപ്പിക്കും. തുടര്ന്നാണ് ഉദ്ഘാടന ചടങ്ങുകള്. പ്രതിപക്ഷ നേതാവ് വി ഡി സതീശന് മുഖ്യപ്രഭാഷണം നടത്തും. സംസ്ഥാനത്തെ എല്ലാ സ്കൂളുകളിലും ഇന്ന് പ്രാദേശികാടിസ്ഥാനത്തില് പ്രവേശനോത്സവമുണ്ട്.
മൂന്ന് ലക്ഷത്തോളം നവാഗതര് ഒന്നാം ക്ലാസിലേക്കെത്തുമെന്നാണ് വിദ്യാഭ്യാസ വകുപ്പിന്റെ പ്രതീക്ഷ. എസ്എസ്എല്സി മൂല്യനിര്ണയത്തിലെ പൊളിച്ചെഴുത്ത് അടക്കം ഈ അധ്യയനവര്ഷം ഒരുപാട് മാറ്റങ്ങളാണ് വിദ്യാര്ത്ഥികളെ കാത്തിരിക്കുന്നത്. പ്രവശനോത്സവത്തോടെ ഈ വര്ഷത്തെ അധ്യയനം തുടങ്ങാന് കുട്ടികളെ ക്ഷണിച്ച് കാത്തിരിക്കുകയാണ് സ്കൂളുകള്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
