കാസര്കോട്: വധശിക്ഷയ്ക്ക് വിധിക്കപ്പെട്ട് യെമനിലെ ജയിലില് കഴിയുന്ന മലയാളി നഴ്സ് നിമിഷ പ്രിയയുടെ മോചനത്തിനായി ചര്ച്ചയ്ക്ക് കൊല്ലപ്പെട്ട തലാലിന്റെ കുടുംബം തയ്യാറെന്ന് യെമന് അധികൃതര് അറിയിച്ചു. യെമനിലെ ഉദ്യോഗസ്ഥര് ജയിലിലെത്തി നിമിഷ പ്രിയയുമായി ദയാധനം സംബന്ധിച്ച ചര്ച്ചകള് നടത്തിയെന്നാണ് വിവരം.
ദയാധനമായി 50 മില്യണ് യെമന് റിയാല (92,000 ഡോളര്)ാണ് മരിച്ച തലാലിന്റെ കുടുംബം ആവശ്യപ്പെട്ടിരിക്കുന്നത്. 10 മില്യണ് യെമന് റിയാല് കോടതി ചെലവും പെനാല്ട്ടിയും നല്കണം. റമസാന് അവസാനിക്കും മുമ്പ് തീരുമാനം അറിയിക്കണമെന്നും യെമന് അധികൃതര് അറിയിച്ചു. യെമനിലേക്ക് പോകാനുള്ള കേന്ദ്രസര്ക്കാര് അനുമതി കാത്തിരിക്കുകയാണ് സേവ് നിമിഷ പ്രിയ ആക്ഷന് കൗണ്സില്.
നിമിഷപ്രിയയെ ദയാധനം നല്കി മോചിപ്പിക്കാനുള്ള ശ്രമങ്ങള്ക്ക് സുപ്രീം കോടതി റിട്ടയേര്ഡ് ജഡ്ജി ജസ്റ്റിസ് കുര്യന് ജോസഫ് ആണ് നേതൃത്വം നല്കുന്നത്. നിമിഷ പ്രിയയെ കാണാന് അമ്മയും മകളും യെമനിലേക്ക് പോകുന്നുണ്ട്. ഇവര് അടക്കമുള്ള സംഘത്തിന് യെമനിലേക്ക് പോകാന് അനുമതി തേടി ആക്ഷന് കൗണ്സില് വിദേശകാര്യ മന്ത്രാലയത്തെ സമീപിച്ചിട്ടുണ്ട്. നിമിഷ പ്രിയയുടെ അമ്മ പ്രേമകുമാരിയും എട്ട് വയസുള്ള മകളുമാണ് യെമനിലേക്ക് പോകാന് വിദേശകാര്യ മന്ത്രാലയത്തെ സമീപിച്ചത്. ഇവര്ക്കൊപ്പം സേവ് നിമിഷ പ്രിയ ഇന്റര്നാഷണല് ആക്ഷന് കൗണ്സിലിലെ നാല് പേരും അപേക്ഷ നല്കിയിട്ടുണ്ട്.
യമന് പൗരന് തലാല് അബ്ദുമഹ്ദിയെ നിമിഷപ്രിയയും കൂട്ടുകാരിയും ചേര്ന്നു കൊലപ്പെടുത്തി മൃതദേഹം വീടിനുമുകളിലെ ജലസംഭരണിയില് ഒളിപ്പിച്ചു എന്നതാണ് കേസ്. 2017 ജൂലൈ 25നാണ് യമന് പൗരനായ തലാല് കൊല്ലപ്പെട്ടത്. യമനില് നഴ്സായി ജോലി ചെയ്യുന്നതിനിടെ സ്വന്തമായി ക്ലിനിക് തുടങ്ങാന് സഹായ വാഗ്ദാനവുമായി വന്ന തലാല്, പാസ്പോര്ട്ട് പിടിച്ചെടുത്ത് നടത്തിയ ക്രൂര പീഡനമാണ് കൊലപാതകത്തിലേക്ക് നയിച്ചത് എന്നാണ് നിമിഷപ്രിയയുടെ വാദം. യമന് സ്വദേശിനിയായ സഹപ്രവര്ത്തകയുടെയും മറ്റൊരു യുവാവിന്റെയും നിര്ദേശപ്രകാരം തലാലിന് അമിത ഡോസ് മരുന്നു കുത്തിവച്ചതു മരണത്തിന് ഇടയാക്കുകയായിരുന്നു. കീഴ്ക്കോടതിയാണ് നിമിഷയ്ക്കു വധശിക്ഷ വിധിച്ചത്.
